من پنچھی بے چین

کتاب: من پنچھی بے چین

شاعر: فرحت عباس شاہ

کمپوزر: زین شکیل

**********************

پربت پربت اڑے پھرے ہے من پنچھی بے چین

جانے کہاں کہاں سے جائیں سانوریا کے نین

آؤ کہیں چھپ کر روتے ہیں ورنہ نگری میں

کوئی سُنے نہ ہُوک دلوں کی کوئی سُنے نہ بین

دِھیرے دِھیرےدھندلا ہوتا جاتا ہے مہتاب

بیت چلا ہے جیون، جیسے بیت چلی ہے رین

ہم تو جیسے دل آنکھوں میں لے کے پھرتے ہوں

بیٹھے بیٹھے ہنسی ہنسی میں رو دیتے ہیں نین

بولو فرحت آخر کس کو دیکھ کے آئے ہو

مدت بعد تری آنکھوں میں دیکھا ہے سُکھ چین

فرحت عباس شاہ

**********************

آزادی

من پنچھی بے چین سمجھ

سینے اور فضا میں کوئی فرق نہیں

پنجروں کے مابین سمجھ

پنچھی کی آزادی اور سکون تو اس کی

من مرضی میں ہوتے ہیں

فرحت عباس شاہ

**********************

کائنات

بس اک تجھ سانول کی ذات ہے

اپنا کُل جہان 

باقی وہم گمان

فرحت عباس شاہ

**********************

رخصتی

چھوڑ کے گھر سنسان سہاگن

لوٹ چلی مہمان سہاگن

دہلیزوں کے کھیل نرالے

ہر بابل کے دیکھے بھالے

سو سو وہم گمان

سو سو وہم گمان سہاگن

لوٹ چلی مہمان سہاگن

چھوڑ کے گھر سنسان سہاگن

لاکھ جتن کر دیکھے پورے

رہ جانے تھے رہے ادھورے

امّاں کے ارمان

امّاں کے ارمان سہاگن

لوٹ چلی مہمان سہاگن

چھوڑ کے گھر سنسان سہاگن

مہمانوں کو گھر جانا ہے

اِک دن چھوڑ کے در جانا ہے

رب کے پاس امان سہاگن

رب کے پاس امان

لوٹ چلی مہمان سہاگن

چھوڑ کے گھر سنسان

چھوڑ کے گھر سنسان سہاگن

فرحت عباس شاہ

**********************

پی نہ ملن کو آئے سانول

من پنچھی کرلائے سانول

دل محتاط طبیعت والا

بن پریتم پچھتائے سانول

تیری آس پہ بیٹھے بیٹھے

برکھا بیت نہ جائے سانول

اندر بیٹھا ڈیرے ڈالے

گھڑی گھڑی بہکائے سانول

آگ لگا جائے اشکوں میں

پلکوں کو سلگائے سانول

بھیڑ سے سہما ہوا ہوں شاید

تنہائی بہلائے سانول

کون دلاسہ دے زخموں کو

کون انھیں سمجھائے سانول

غم آ جاتے ہیں رستے میں

دامن کو پھیلائے سانول

ہنستا رہنے والا فرحت

چھپ چھپ نیر بہائے سانول

فرحت عباس شاہ

**********************

قدر

بے چینی انمول دِوانے

بے چینی انمول

مٹی میں مت رول

فرحت عباس شاہ

**********************

گریہ

بارش وار برس جاتے ہیں

بادل روکے کون

آنسو پونچھے کون

فرحت عباس شاہ

**********************

امّاں نی

امّاں نی میری آنکھیں ترسیں

سانول آس نہ پاس

امّاں نی میری نیندیں بھاگیں

مجھ سے کوسوں دور

امّاں نی مِرے سپنے ٹوٹے

چُبھ گئی سینے پھانس

امّاں نی میں پیاس سے تڑپی

دل دریا کے بیچ

امّاں نی مِری سنے نہ کوئی

ہاری کر کر بین

امّاں نی مِری کشتی ڈوبی

عین کنارے پاس

امّاں نی مِرا سانول بچھڑا

ساون رُت کے پار

امّاں نی مِرے اندر بادل

بارش روکے کون

امّاں نی میں ہوئی اکیلی

شہر میں ایک ہجوم

امّاں نی میں نے چاند چرایا

جیون ہوا اندھیر

امّاں نی میں نے عشق کیا ہے

سہہ لوں گی حالات

امّاں نی مِرے نین سہاگی

دل برہا کی مانگ

فرحت عباس شاہ

**********************

درد نہ جانے رِیت نی مائے

اس کے اپنے گیت نی مائے

گڑیا سے اب دل نہ بہلے

چاند گیا ہے جیت نی مائے

وقت نے بیت ہی جانا تھا اور

وقت گیا ہے بیت نی مائے

کرتا پھرے ہے دل دنیا میں

من مانی من میت نی مائے

بچھڑ گئی کوئل باغوں سے

بچھڑ گیا سنگیت نی مائے

باقی سارے رشتے جھوٹے

سچی تیری پریت نی مائے

فرحت عباس شاہ

**********************

معرفت

سات سمندر گہرائی میں اتر کے دیکھا

پھر بھی لاگے

ایک سمندر اور ابھی ہے

ایک سمندر اور

فرحت عباس شاہ

**********************

بھاگ خرید کے لائی نی میں

آگ خرید کے لائی نی میں

آگ خرید کے لائی

دنیا داری، قسمت ماری

شکلیں بدلےروز 

دل کی ایک نہ چلنے دے اور

عقلیں بدلے روز

عشق کے کاروبار میں پڑ کر اچھا نفع کمایا

گھڑی گھڑی پل پل کو اپنے دل کا ماس کھلایا

تَن، مَن، دَھن سب بیچ دیا اور

بھاگ خرید کے لائی نی میں

بھاگ خرید کے لائی

کوئل لینے گھر سے نکلی

کاگ خرید کے لائی نی میں

کاگ خرید کے لائی

فرحت عباس شاہ

**********************

میں نِیچ، کنیز، گدا ڈھولا

مری اجڑی مانگ سجا ڈھولا

دیوانہ ہے مغرور بہت

مِرا شکوہ کرے ہوا ڈھولا

مرا دل رستے پر آن پڑے

مِری کر منظور دعا ڈھولا

تو سِمٹ کے ایک ہوا مجھ میں

مِرے بکھر گئے اجزا ڈھولا

کچھ دل میں درد سمایا ہے

کچھ سر میں ہے سودا ڈھولا

وہ بولا میرے لہجے میں

میں نے جتنی بار کہا ڈھولا

فرحت عباس شاہ

**********************

تقسیم

دن کو آدھا آدھا کر لینے میں

کوئی حرج نہیں ہے

رات کی بات الگ ہے ساجن

رات کی بات الگ

فرحت عباس شاہ

**********************

محبوب

من کے اندر تاڑ لگا کر بیٹھ گیا ہے

دھوکا کیسے دوں؟

فرحت عباس شاہ

**********************

من مندر

چَنچل چال چلا چنّدِرما

سو سو جتن کریں جل پریاں

جی بھر دیکھ نہ پائیں

آنکھوں کی جل پریاں جس کو جی بھر دیکھ نہ پائیں

دُور دُور تک پھیل گیا ہے جیون کے بَن میں

جیون بن میں جھیلیں ترسیں

پیڑ بلائیں، رستے راہ تکیں

من مندر

من موہن بستی

من ماہی من میت

جگ کی اپنی اپنی رسمیں

اپنی اپنی ریت

من مرضی کا شاہ نرالا

ہار کے جائے جیت

برسوں بعد دریچے کھولے

کھل کر کھیلے پریت

چنچل چال چلا چندرما

آن اُترا من میں

فرحت عباس شاہ

**********************

ترس گئے ہیں نین، جیا بے چین رہے 

سن سن اپنے بین، جیا بے چین رہے

اس سے ، جو خاموشی سی چھائی ہے، ہم 

 دونوں کے مابین، جیا بے چین رہے

ساری ساری شام تمہاری راہ تکے

ساری ساری رین، جیا بے چین رہے

دل کی تاریں ملی ہوئی ہیں آپس میں 

سانول ہے بے چین، جیا بے چین رہے

آدھا آدھا چاند کہاں راس آتا ہے 

دیکھ دیکھ قوسین، جیا بے چین رہے

فرحت عباس شاہ

**********************

اختیار

ایک ستارہ ماتھے پر ہے

ایک ستارہ دور

فرحت عباس شاہ

**********************

ظاہر باطن

چہرے مُہرے سے لگتا تھا اچھا ہے

اتنی مدت بعد ملا تھا

خوش خالی کی خواہش بھی کیسی خواہش ہے

چہرے مُہرے سے لگتا تھا اچھا تھا، پر

دل کا حال خدا جانے

فرحت عباس شاہ

**********************

سانوریا

سچ سُچّل سُرخاب سنوریا

ہاتھ لگے تو میلا ہو

گُل گوری گاگریا والی

گال سَندُور میں دودھ

چاندی بھر بھر چاند چہیتا

پائل کو چمکائے

شام ہنسے، شرمائے شہابی

دیکھ دیکھ دلدار

گیت، گگن گائے ، گِن گِن کے

گم سُم یار کے گُن

گُم سُم بیٹھے یار سجن کی

باتیں کرے ہزار نظریا

ہو جائے آباد نگریا

سچ سُچّل سُرخاب سنوریا

ہاتھ لگے تو میلا ہو

فرحت عباس شاہ

**********************

جب سے ہوا تو آنکھوں میں مہمان پیا

اُڑتے پھرتے ہیں ہر سُو اَرمان پیا

پیڑ بھی تم بن اُکھڑے اُکھڑے پھرتے ہیں

اور راہیں بھی پھرتی ہیں ویران پیا

تو نے کون سا پیچھے مڑ کر دیکھا ہے

ہنستا بستا شہر ہوا سنسان پیا

دُکھ میں سب ہو جاتے ہیں انجان پیا

ان باتوں پہ کیا ہونا حیران پیا

عقل پہ پردہ پڑتا ہے تو پڑنے دے

جاتا ہے تو جانے دے ایمان پیا

فرحت عباس شاہ

**********************

تُو جو ہم سے دُور

ہم بے چین نصیبوں والے 

کیسی کیسی خلش کےہاتھوں

ہوتے ہیں مجبور

تو جو ہم سےدور وے سانول

تو جو ہم سے دور

فرحت عباس شاہ

**********************

آس امید کی کُونج

آس امید کی کُونج مسلسل کُرلائے

جو دانستہ بچھڑ گیا ہو

کون اُسے واپس لائے

آس امید کی کُونج تو بیچاری پاگل ہے

فرحت عباس شاہ

**********************

جوگی

ساجن کہیں نہ پائے جوگی

نگر نگر منڈلائے جوگی

روگی ہو بیٹھا دیوانہ

چین کہاں سے لائے جوگی

چاہ کی بھول بھلیّاں اندر

اپنا آپ گنوائے جوگی

دل کا صحرا دیکھ دیکھ کے

ساون کیوں پچھتائے جوگی

دَر دَر جا کے ہوا سوالی

اپنا قول نبھائے جوگی

شہروں سے تھک ہار کے آخر

ویرانوں میں آئے جوگی

اِک چھوٹی سی کٹیا اندر

پورا شہر بسائے جوگی

کسی جدائی کے پنجرے میں

من پنچھی کُرلائے جوگی

فرحت عباس شاہ

**********************

دِلدار، مِرے دل جان مِرے سلطان پیا

مِرے پورے کر اَرمان مِرے سلطان پیا

یہ دل، یہ بچھڑے ہوئے مکینوں کا مسکن

یہ شہر بہت ویران، مِرے سلطان پیا

یہ جنگل درد، پہاڑ مصیبت، ڈر، صحرا

تِرے کرم سے سب آسان مِرے سلطان پیا

مِری بے چینی، مجھے عین عبادت لگتی ہے

مِرا عشق پہ ہے ایمان ،مِرے سلطان پیا

مجھ چکنا چُور کا اب تو یہی سہارا ہیں

مِرے سپنے، وہم، گمان مِرے سلطان پیا

میں تیرا داس، غلام ہوں ، نوکر ہوں مولا

تو سدا مِرا سلطان، مِرے سلطان پیا

مجھے بینائی دے، راہ بتا، منزل دِکھلا

میں اندھا، میں انجان مِرے سلطان پیا

فرحت عباس شاہ

**********************

ہم دیوانے

ہم دیوانے

سفر سفر تنہائی اپنے دل پر جھیلیں

رستے ہیں سنسان

جن رستوں پر ایک ہجوم ہے

ان رستوں پر چلنے والے اور وہ رستے

آپس میں اک دھوکا دھوکا منزل کھیلیں

منزل ہے حیران

فرحت عباس شاہ

**********************

صدمہ

دَر کھولا تو

دُور دُور تک ویرانی تھی

جانے کس نے دستک دی تھی دروازے پر؟

فرحت عباس شاہ

**********************

ترے سنگ سجن

ترے سنگ سجن

مِرے رنگ سجن

مِری جھوٹ فریب

سے جنگ سجن

کبھی واپس کر

مِرا جھنگ سجن

سانسیں مشکل

دل تنگ سجن

میں اڑتی پھروں 

پتنگ سجن

حق ہُو بولے

اَنگ اَنگ سجن

تو میرا ہے

سب دنگ سجن

فرحت عباس شاہ

**********************

اب دور ہی رہ یا مل سجنا

تجھے سونپ دیا ہے دل سجنا

اب خوشبو ہر سو پھیلے گی

اِک زخم گیا ہے کھِل سجنا

ہر رات ترے بن سینے پر

ہے دَھری ہوئی اِک سِل سجنا

ہر حُسن میں وار دوں تم پر سے

کیا آنکھیں، عارض، تِل سجنا

سینے میں میٹھا میٹھا دکھ

آنکھوں میں ہے جھلمِل سجنا

فرحت عباس شاہ

**********************

دیوانگی

دل اور دل کے بیچ جو صحرا پڑتا ہے

عقل کے پاس تو پیر بھی مانگے تانگے ہیں

ہاں البتہ دیوانوں کی بات الگ ہے

فرحت عباس شاہ

**********************

دیر نہ کرنا

فرحت اتنی مدت بعد تو گھر آیا ہے

اس کے پیروں کے چھالوں کی کچھ نہ پوچھو

ہاتھوں کے زخموں کی بات بھی چھوڑ ہی دو

آنکھوں کی تحریریں پڑھنا آتی ہیں تو

اِک لمحہ بھی دیر نہ کرنا

اِن آنکھوں کو اپنے دل کا حال چھپانا آتا ہے۔۔۔یہ۔۔۔

پل میں حال چھپا جائیں گی

فرحت عباس شاہ

**********************

دُھوپ

اک دُھوپ انوکھی درد کی

مِرا روپ کرے تبدیل

کبھی تنگ دلوں میں دوڑتی

کرے روشن دل قندیل

کبھی تڑپے سوچ سوال میں

کبھی جاگے خواب نگر

اک دُھوپ انوکھی درد کی

مرے دل میں کر گئی گھر

مرے دل کو کرے اَصیل

فرحت عباس شاہ

**********************

تم بن درد ہزار وے ڈھولا

دوری سے نا مار وے ڈھولا

کبھی کبھار اپنی آنکھوں سے

تنہا تنہا بہنے والے

آنسو کیے قطار وے ڈھولا

تم بن درد ہزار وے ڈھولا

شرم حیا بھی آڑے آئے

صبر زباں پر جم جم جائے

دکھڑے کریں پکار وے ڈھولا

تم بن درد ہزار وے ڈھولا

تُو منزل، تُو دَر، تُو رستہ

تیری ذات کا پھیل گیا ہے

چاروں سمت خصار وے ڈھولا

تم بن درد ہزار وے ڈھولا

آتش سی کوئی بھری لہو میں

سینہ کر گئی دھواں دھواں

من بیٹھا من ٹھار وے ڈھولا

تم بن درد ہزار وے ڈھولا

نیندیں شب بھر پاس نہ آئیں

دھڑکن دھڑکن بوجھ نرالا

کر بیٹھے ہیں پیار وے ڈھولا

تم بن درد ہزار وے ڈھولا

ساری عمر ریاضت کر کے

ہم نے تو بس ایک ذرا سا

واپس کیا اُدھار وے ڈھولا

تم بن درد ہزار وے ڈھولا

فرحت عباس شاہ

**********************

سَاون

ساون کی بنیاد میں کس کے آنسو ہیں؟

صدیوں پہلے شاید کوئی

صدیوں بیٹھ کے رویا ہے

فرحت عباس شاہ

**********************

اشتراک

رات ہمیں راس آجاتی ہے

دُکھ سُکھ کی ہے سانجھ

ہم دونوں ہیں بانجھ نصیبوں والی صدیاں

صدیوں سے ہیں بانجھ

فرحت عباس شاہ

**********************

کاٹ دے رات اندھیر وے سانول 

کاٹ دے رات اندھیر وے سانول 

دیکھیں لوگ سویر وے سانول

حوصلے والی ہمت والی 

اب وہ پہلی بات نہیں ہے 

اب تو درد سمندر بن کے 

ٹوٹی پھوٹی کشتی جیسا 

دل لیتا ہے گھیر وے سانول

شام ڈھلے تھک ہار کے یادیں 

دل کے گھر میں لوٹ کے آئیں 

اپنے اپنے دیپ جلائیں 

آدھی آدھی رات کو اٹھ کر 

دکھ لیتے ہیں گھیر وے سانول

ہاتھ میں دل کا ہاتھ نہیں 

سفر بہت لمبا ہے لیکن 

اپنا آپ بھی ساتھ نہیں ہے 

ایسے عالم میں تو اکثر 

ہو جاتی ہے دیر وے سانول

میں چاہوں اور تو نہ چاہے 

زخموں پر زخموں کے پھاہے 

قدم قدم پر دو دو راہے 

ہاتھ پاؤں میں چکر ہے یا 

سب قسمت کا پھیر وے سانول

کاٹ دے رات اندھیر وے سانول 

دیکھیں لوگ سویر وے سانول

فرحت عباس شاہ

**********************

مرے دل میں بسو

میں داسی ڈھولن یار دی

مری پوری ہوئی مراد

اک آ کے یار کی قید میں

ہوا تَن ، مَن، دَھن آزاد

مری لُوں لُوں کوکے ہجر میں

کرے دَم دَم دِل فریاد

کوئی درد مُصلّیٰ ڈال کے

مری مسجد کرے آباد

فرحت عباس شاہ

**********************

تضاد

بھولی بھالی شکلوں والے

سو سو کریں فریب

فرحت عباس شاہ

**********************

قبرستان

آؤ! 

مل کے قبرستان سے ہو آتے ہیں

ایک نہ اِک دن

اک دوجے سے

آخر بچھڑ کے آنا ہے

فرحت عباس شاہ

**********************

مر جانا ریت جہان پیا

سب دو پل کے مہمان پیا

آنکھوں میں بہت سے سپنے ہیں

ہیں دل میں بہت ارمان پیا

دو چار قدم پر منزل تھی

کس جا ٹوٹے پیمان پیا

کیا لوگ کہیں جا اور بسے

کیوں بستی ہے سنسان پیا

بس آنکھوں پر مت جا میری

میرا دل بھی ہے ویران پیا

سب یار بھی آنکھیں پھیر گئے

اور تو بھی ہوا انجان پیا

ہے ایک اکیلا دنیا میں

دیوانے کو پہچان پیا

اس راہ پہ درد مسافت ہے

یہ راہ نہیں آسان پیا

اس عشق میں شرطوں پر اکثر

لگ جاتا ہے ایمان پیا

فرحت عباس شاہ

**********************

اوقات

سورج کے کشکول میں

سکّہ ڈالے گا۔۔۔۔تو

تیرا اپناچھوٹا پن جل جائے گا

فرحت عباس شاہ

**********************

بے فیض

اپنے پیر جلیں تو دنیا

پیڑ کی مانگے خیر

فرحت عباس شاہ

**********************

پاگل من بیمار

دل کے روگ ہزار وے سائیں 

دل کے روگ ہزار 

کوئی آر نہ پار وے سائیں 

کوئی آر نہ پار

پل بھر کو بھی چین نہ پائے 

پاگل من بیمار وے سائیں 

پاگل من بیمار

آنکھیں ترس گئیں ہیں، تیرے

کب ہوں گے دیدار وے سائیں 

کب ہوں گے دیدار

جیون جل جل راکھ ہونے کے 

اچھے ہیں آثار وے سائیں 

اچھے ہیں آثار

آنکھوں کا جنگل کیا بولے 

گونگے ہیں اشجار وے سائیں

گونگے ہیں اشجار

دل اور ہجر کی جنگ ہے سانول 

درد ہوا سالار وے سائیں 

درد ہوا سالار

تم بن جگ میں پھرے ہے فرحت 

بے چارہ بے زار وے سائیں 

بے چارہ بے زار

فرحت عباس شاہ

**********************

دنیا

دنیا گورکھ دھندا سائیں

دنیا گورکھ دھندا

سچی بات کا مندا سائیں

سچی بات کا مندا

دم دم میں لاچاری بولے 

قدم قدم بیماری بولے

دنیا درد پلندا سائیں 

سچی بات کا مندا سائیں

لاکھوں درد فریب وے ڈھولا 

پیروں کی پازیب وے ڈھولا

ایک اکیلا بندہ سائیں 

سچی بات کا مندا سائیں

دُنیا کالی میل کچیلی 

بے برکت ،بد عیبی ویلی

کر دیتی ہے گندہ سائیں

سچی بات کا مندا سائیں

دُنیا گورکھ دھندا سائیں 

سچی بات کا مندا سائیں

فرحت عباس شاہ

**********************

اپنا اپنا رُوپ

یک طرفہ چاہت لاحاصل

بھلے دکھائے رُوپ

نا چھاؤں نا دھوپ

فرحت عباس شاہ

**********************

عشق

سات سمندر تیر آتی ہے

ایک اکیلی جان

فرحت عباس شاہ

**********************

درد شناسی

دکھڑے کھا گئے ماس ہمارا

دکھڑے کھا گئے ماس

تن دھاگے سے آن ملا ہے

دھاگہ ٹوٹ بھی جائے

من جاگے تو وحشت بھاگے

بَن بَن نگر نگر

ہجر نہ آئے راس ہمیشہ

ہجر نہ آئے راس

پیاس کا دریا ٹھاٹھیں مارے

روحیں ہوئیں اداس

اک وہ ناواقف دکھ سُکھ سے

اک ہم درد شناس

ہم جو درد شناس ہوئے تو

دکھڑے کھا گئے ماس ہمارا

دکھڑے کھا گئے ماس

فرحت عباس شاہ

**********************

چپ نہ رہو بے چین مسافر

بیت چلی ہے رین مسافر

اور نہیں تو دل کے بارے

کچھ تو کہیں گے نین مسافر

جنگل میں کوئل کرلائے

ہر سو گونجیں بین مسافر

تیری آس میں رو دیتی ہیں

شام ڈھلے طرفین مسافر

گرد میں گرد ہوا آخر کو

رستوں کے مابین مسافر

پاؤں سے جانے کون اتارے

چھالوں کی نعلین مسافر

فرحت عباس شاہ

**********************

تما شا

روز اداسی چہرہ بدلے

روز دکھائے ہاتھ

روز اک نئے سرے سے کھیلے

بازی دل کے ساتھ

فرحت عباس شاہ

**********************

وقت

ورنہ تو ہم کبھی نہ بچھڑیں

شام اور مجھ کو

رات الگ کر جاتی ہے

فرحت عباس شاہ

**********************

سائیں سائیں کُوک محبت

سائیں سائیں کُوک محبت

سائیں سائیں کُوک 

اکلاپے کی مار نرالی

جیون نیلو نیل

اٹک اٹک کر آہیں نکلیں

سینے اندر کیل

درد عدالت چپ دروازے

کوئی نہ سنے اپیل

اکلاپے کی مار نرالی

جیون نیلو نیل

سائیں سائیں کُوک نصیبا

سائیں سائیں کُوک 

دل میں عجب اندھیرا پھیلا

بینائی بے چین

ایک جھلک دکھلا کے سانول

اوڑھ گیو رے رین

جنگل جنگل، صحرا صحرا

گونجیں دل کے بین

گھائل ہو گئے نین مسافر 

گھائل ہو گئے نین

سائیں سائیں کُوک نصیبا

سائیں سائیں کُوک 

سائیں سائیں کُوک جیارا

سائیں سائیں کُوک 

جیت گئی کوئی رات انوکھی

سورج کے اُس پار

اک اک گر کر اشک ستارے

دل کو مار گئے

جتنے رنگ امنگوں کے تھے

سب اُس پار گئے

سائیں سائیں کُوک جیارا

سائیں سائیں کُوک 

سائیں سائیں کُوک مسافر

سائیں سائیں کُوک 

فرحت عباس شاہ

**********************

بات نرالی

سائیں کی ہر بات نرالی

کبھی کبھی تو

دانہ دُنکا چگنے والے

پنچھی بھی بھٹکا دیتا ہے

کبھی کبھی تو

عمر کے بھولے بھٹکےہوئے پرندوں کو بھی

گھر کی راہ دکھا دیتا ہے

فرحت عباس شاہ

**********************

باہر دھڑکے یا اندر دل

دیوانہ، مست قلندر دل

سینے میں لے کر پھرتے ہیں

ہم اک بے چین سمندر دل

خالی ہے کتنی صدیوں سے

خاموش پرانا مندر دل

اک عشق میں کیا لاچار ہوا

فاتح، سالار، سکندر دل

بس تڑپ تڑپ کر رہ جائے

سینے کے اندر اندر دل

فرحت عباس شاہ

**********************

مرے دریا، دشت، شجر سائیں

تری راہ میں خاک بہ سَر سائیں

مرا دل، دہلیز تری مولا

مری پیشانی ترا در سائیں

ہر رات تمہارے رستوں پر

مرے سپنے کریں سفر سائیں

تم بن یہ دل تو اجڑ گیا

کبھی آن بساؤ گھر سائیں

منہ زور اڈاریاں مارے دل

ترے عشق لگائے پر سائیں

میں نے غم کا ڈنک نکال دیا

اب کوئی خوف نہ ڈر سائیں

تری شاخ سے جا کر الجھ گئی

بے چین، اداس، نظر سائیں

فرحت عباس شاہ

**********************

ماہی بن دریا وے سائیں

سائیں دل دیوانہ کُوکے

آنسو کریں پکار وے سائیں

رو رو آنکھیں تھک ہاریں تو

روح اٹھائے بار وے سائیں

کون اٹھائے گھائل جی پر

گری ہوئی دیوار وے سائیں

دھڑکن دھڑکن درد کراہے

سانس ہوئی بیمار وے سائیں

تم بن کس کی راہ تکیں ہم

بے چارے لاچار وے سائیں

سائیں من تڑپے ہے جیسے

ماہی بن دریا وے سائیں

زخموں کی پوشاک پہن کر

ہنسی خوشی دنیا داروں کو

پیار پریت کی راہ پہ چل کے

ہم نے دیا دِکھا وے سائیں

عمر کا بچھڑا ہوا ہمارا

کبھی اچانک یاد آئے تو

سینے کی جھیلوں سے نکلے

ظالم سرد ہوا وے سائیں

صدیوں کے بھولے بھٹکوں کو

ہجر کی بھول بھلیّاں اندر

کب تک چلتے رہنا ہو گا

بچھڑے یار ملا وے سائیں

سائیں من پنچھی گھبرائے

شالا کسی کو قید نہ آئے

اندر آتش شور مچائے

باہر کھلی فضا تڑپائے

پنجرہ مارے ڈنگ وے سائیں

خواہش خواہش کی آپس میں 

چھِڑ جاتی ہے جنگ وے سائیں

کشتی پار اُتر تو جاتی

رستے میں تھا جھنگ وے سائیں

میں نے اُس کا سوگ منایا

اُس نے خوشی منائی میری

اپنی اپنی عادت مولا

اپنے اپنے رنگ وے سائیں

سائیں من پنچھی گھبرائے

سائیں دل دیوانہ کُوکے

سائیں من تڑپے ہے جیسے

ماہی بِن دریا وے سائیں

فرحت عباس شاہ

**********************

تن تنہا

ہم تو تیری خاطر سائیں

اپنے آپ سے بھی لڑنے کو نکل پڑیں گے

لیکن سائیں

ان کاموں میں بستی ساتھ نہیں دیتی

یہ بھی ممکن تھا کہ ہم بھی

بستی بن کے چُپ سادھے آرام کریں

لیکن سائیں

ان کاموں میں ہستی ساتھ نہیں دیتی

فرحت عباس شاہ

**********************

دَم، دنیا، دل، دلدار سجن

کس دن ہو گا دیدار سجن

بس پل پل ایک تجھے ڈھونڈیں

آنکھیں دیوانہ وار سجن

کچھ میں بھی دریا تیر آؤں

کچھ تُو بھی گرا دیوار سجن

تم مرشد پیر طبیب مرے

میں بے چارہ بیمار سجن

جب تک تیری مرضی نہ ہو

سب چارے ہیں بے کار سجن

فرحت عباس شاہ

**********************

صحرا صحرا بھاگے

دیوانوں کے بھاگ نہ جاگے

صحرا صحرا بھاگے

گلی گلی کی خاک بھی چھانی

دُکھ اور سُکھ کی ایک نہ مانی

رات رات بھر جاگے

بے تابی کا دیس بسایا

بے چینی کا رنگ رچایا

دل کے آگے آگے

پور پور پر زخم سجائے

قدم قدم پر بوجھ اٹھائے

دنیا کو کیا لاگے

پیارے دل کو لوٹ ہی جائیں

جانے کس پل ٹوٹ ہی جائیں

سارے کچے دھاگے

دیوانوں کے بھاگ نہ جاگے

صحرا صحرا بھاگے

فرحت عباس شاہ

**********************

ماہی ماہی کُوک دِلا

ماہی ماہی کُوک دِلا 

بس ماہی ماہی کُوک

جنگل، شہر، سمندر، صحرا، ہر جا ہوئی اداس

وحشت اندر غضب مچاوے چین نہ آئے راس

بستی میں رہ کر بھی ہیں ہم دیوانے بِن باس

سانس بھی لیں تو سینے سے اکثر اٹھتی ہے ہُوک

ماہی ماہی کُوک دِلا

بس ماہی ماہی کُوک

کونسا لمحہ ایسا ہے جب آنکھ نہیں پُر نم

قدم قدم پہ کوئی نہ کوئی آ ملتا ہے غم

لیکن ماہی کی خاطر یہ سب لگتا ہے کم

زخموں کے کوہسار بھی سہہ جاتی ہے جان ملُوک

ماہی ماہی کُوک دِلا

بس ماہی ماہی کُوک

فرحت عباس شاہ

**********************

کبھی بادل وار برس سائیں

کبھی بادل وار برس سائیں

مرا سینہ گیا ترس سائیں

میں توبہ تائب دیوانہ

آبادکروں کیا ویرانہ

مری بس سائیں، مری بس سائیں

کبھی بادل وار برس سائیں

اس عشق نے عجب اسیر کیا

خود دل سینے میں تیر کیا

کیا چلے گی پیش و پس سائیں

کبھی بادل وار برس سائیں

ہم بھی کچھ کھل کر سانسیں لیں

اشکوں سے دھل کر سانسیں لیں

کچھ گھول فضا میں رَس سائیں

کبھی بادل وار برس سائیں

فرحت عباس شاہ

**********************

دل روئے زار و زار سجن

ترا کب ہو گا دیدار سجن

ترا ہر لمحہ احساس پیا

ترے ہر جانب آثار سجن

اور تیرا کام مسیحائی

ہم صدیوں کے بیمار سجن

اک ویرانی اک تنہائی

تو ان دونوں کے پار سجن

کر لیں آنکھوں کے دریا میں

ہم نے پلکیں پتوار سجن

کچھ دیر گلے لگ رو پائیں

ناممکن ہے دو یار سجن

فرحت عباس شاہ

**********************

دکھ دریا

دل دنیا دکھ دریا لوگو

لہر لہر بے تاب

موج موج ان گنت جدائی

ساحل ساحل خواب

اک دریا پھر پیاسا دریا

عجب حساب کتاب

بھنور بھنور کے اندر دیکھے

اور کئی گرداب

گھونٹ گھونٹ پانی کی تہہ میں

سو سو دشت سراب

دل دنیا دکھ دریا لوگو

نئے سے نیا عذاب

فرحت عباس شاہ

**********************

مٹھاس

رات رنگیلی جھلمل بتیاں جلا جلا کر

چھیڑے من کے تار

سانوریا کے رنگ نرالے کر کر یاد ہنسے

رات رنگیلی کر کر یاد ہنسے

گاگریا سے بھری ہوئی لچکیلی چال کے چلن پکارے

بانسریا کے سُر میں جیسے کوئی گیت بَسے

سانوریا کی آنکھوں کے مہتابوں کو دل چھو کر آئے

جیسے پھُل جھڑیاں سی پھوٹیں 

اندر اندر

اندر اندر بالموا کی خوشبو مہکے

مہکے پریت پیار

رات رنگیلی جھلمل بتیاں جلا جلا کے

چھیڑے من کے تار

فرحت عباس شاہ

**********************

لیے پھرے ہے یار ترا دیدار سجن

تھام کے مری مہار ترا دیدار سجن

دل خود اپنے اندر جھانک کے کرتا ہے

اکھیوں کے اس پار ترا دیدار سجن

جھلمل جھلمل لہرائے بینائی میں

شوخی کرے ہزار ترا دیدار سجن

آنکھوں کے دامن کو کھینچ کے قدم قدم

کرتا ہے اصرار ترا دیدار سجن

کبھی کبھی دکھلا دیتا ہے دکھیوں کو

جیون کے آثار ترا دیدار سجن

فرحت عباس شاہ

**********************

ممکن ناہیں بات نہ مانے

آپ کہیں اور رات نہ مانے

عجب فقیر توکّل والا

عشق کبھی خدشات نہ مانے

جاں ہر اک موسم سے باغی

دل میرے حالات نہ مانے

ہجر میں ایسا کب ہوتا ہے

آنکھ کہے برسات نہ مانے

خود داری کا پیکر جوگی

چاہت کی خیرات نہ مانے

فرحت عباس شاہ

**********************

خاموشی کے ساز

دنیا درد نہ جانے امڑی

دل سے دُور دراز

دل سے دور دراز بسے ہے

دنیا دُور دراز

اشک لہو میں گھُل مل جائیں

سینہ سسک سسک سہلائیں

آہیں بے آواز

دُور دُور تک روح میں گونجیں

خاموشی کے ساز

جانے کس نقطے پر جا کر

کھلے غموں کا راز

ابھی تو ہے آغاز نی امڑی

ابھی تو ہے آغاز

دنیا در د نہ جانے امڑی

دل سے دُور دراز

فرحت عباس شاہ

**********************

نامعلوم

ہم دیوانے

بھول بھلیّاں کب تک کھیلیں

آخر کب تک انجانے رستوں میں بھٹکیں

جانے کس کی خاطر گھر سے نکل پڑے تھے

جتنا ان دیکھا محسوس کیا ہے ہم نے

سب کب عادی ہوتے ہیں ان باتوں کے

بھول بھلیّاں چھُوکر ہاتھ جلا بیٹھے

بھول بھلیّاں چل چل پیر گنوا بیٹھے

بھول بھلیّاں جھیل کے 

اپنے سارے نام نشان مٹا بیٹھے

ہم دیوانے

بھول بھلیّاں کب تک کھیلیں

کب تک جھیلیں

فرحت عباس شاہ

**********************

بے کنار

عشق سمندر ساحل کیسا

کوئی آر نہ پار

چاروں سمت بھنور اٹھلائیں

بن بن درد کے مور

لہریں اونچا نیچا کھیلیں

کشتی بے پتوار

بے چینی سے جھگڑا کیسا

چپ میں سو سو شور

ہار میں بھی اک جیت انوکھی

جیت میں بھی اک ہار

عشق سمندر ساحل کیسا

کوئی آر نہ پار

فرحت عباس شاہ

**********************

کچھ دیپ پڑیں گے جل سانول

کچھ دور تلک تو چل سانول

اُس سورج کا اجیارا کیا

جو آپ گیا ہو ڈھل سانول

کبھی آ بس اُجڑے نینوں میں

کبھی دیکھ ہمارے تھل سانول

تُو دھیرج، شانت، حکیم پیا

میں دیوانہ بے کل سانول

تُو عقلِ کُل تُو سب دانا

میں مجنوں میں پاگل سانول

تِرے پاس تمام مسیحائی

تِرے پاس دکھوں کا حل سانول

فرحت عباس شاہ

**********************

پھر پیا کے رہے قریب سجن

پھر قسمت ہوئی رقیب سجن

یہ پیار پریت کی ریت عجب

یہ رسم رواج عجیب سجن

کچھ پوچھو نہیں، ہوئے کتنے

ہم تیرے بنا غریب سجن

ہم دیوانے بستی بستی

خود لے کے پھریں صلیب سجن

اے بھاگ ہمارے جاگ کبھی

کبھی سونا چھوڑ نصیب سجن

فرحت عباس شاہ

**********************

عجیب اداسی

رات عجیب اداس ہوئے ہم

ٹھہرے، نا بے چین ہوئے

زورا زوری ہنسے نہ روئے

اجڑے نا آباد ہوئے

حبس بھی کم تھا آزادی بھی

رونق بھی اور بربادی بھی

پَلک پَلک جاگے نا سوئے

منزل پر پہنچے ، نا کھوئے

کتنی عجب اداسی تھی اس خالی پن میں

سارا کچھ تھا اور پھر کچھ بھی نہیں تھا من میں

فرحت عباس شاہ

**********************

سائیں سُکھ سہاگ سلامت

سائیں سکھ سہاگ سلامت رہے پیا پردیس

جسم ملن سے وصل نہ ہووے

نقلی شئے بھی اصل نہ ہووے

لاکھ بدل لے بھیس

سائیں سکھ سہاگ سلامت رہے پیا پردیس

دن نکلے پر سحر نہ لاگے

ساجن بن گھر گھر نہ لاگے

دیس نہ لاگے دیس

سائیں سکھ سہاگ سلامت رہے پیا پردیس

فرحت عباس شاہ

**********************

آ سانول مل دکھڑے کھیلیں

آسانول مل دکھڑے کھیلیں

رو رو حال کہیں

جیون کی اک ایک مصیبت

گن گن رات گزاریں

اِدھر اُدھر کی باتیں کر کے

اصلی بات گزاریں

رو رو خوشیاں یاد کریں ہم

ہنس ہنس درد کہیں

آ سانول مل دکھڑے کھیلیں

رو رو حال کہیں

ہجر وصال کے قصے چھیڑیں

صبح سے کر دیں شام

دل کی روشنیوں سے لکھیں

رات پہ غم کا نام

اک دوجے کی انگلی تھام کے

غم کے سنگ رہیں

آ سانول مل دکھڑے کھیلیں

رو رو حال کہیں

آنکھوں کے دریا سے نکلیں

یادوں کے سو رنگ

کھینچ کھانچ کے دل لے جائیں

ہیر سیال کے جھنگ

ان رنگوں کی لہروں پر ہم

آ سانول مل دکھڑے کھیلیں

ہو کر مست بہیں

فرحت عباس شاہ

**********************

اختتام

**********************

فرحت عباس شاہ

**********************