بارشوں کے موسم میں

کتاب: بارشوں کے موسم میں

شاعر: فرحت عباس شاہ

کمپوزر: زین شکیل

**********************

دل اداس رہتا ہے

بارشوں کے موسم میں

زندگی پگھلتی ہے

خواہشوں کے موسم میں

وقت ٹھہر جاتا ہے

منتظر نگاہوں میں

جنگلوں کے خطرے ہیں

بستیوں کی راہوں میں

ہو سکے تو لوٹ آنا

پیار کی پناہوں میں

عشق کا اجارہ ہے

دل کی شاہراہوں پر

فرحت عباس شاہ

**********************

ہمیں بھی شام ہی سے گھیر لیتی ہے پریشانی

پرندوں کی طرح ہم بھی گھروں کو لوٹ آتے ہیں

توقع تھی کہ کوئی لوٹ کر آئے گا جیتے جی

مگر یہ لوٹنا اور موت آ جانا اچانک ہی

سمندر سے کبھی پوچھو تمہیں رو کر بتائے گا

کوئی ایسا نہیں تھا جو تلاطم کو سمجھ پاتا

تمہیں اپنے کسی سکھ کا نشہ ہو گا مگر یارو

ہمیں بھی ناز ہے اپنے دکھوں کی دلربائی کا

مری دیوانگی وہ دیکھ آئی ہے کہ فرحت جی

تمنا کی مسافت اب مسافت ہی نہیں لگتی

فرحت عباس شاہ

**********************

روئیں روئیں کو قیدی کر کے لے گیا عشق خدا

سائیں تیری شہنشہی میں ایسے ہوئے اسیر

سورج باندھ کے لاپھینکیں گے تیرے قدموں میں

ہم بے تاب مزاجوں والے ہم بے چین نصیب

ڈھولا تیری یادیں، تیرے خواب ، خیال طبیب

لاوارث بیماروں جیسا ہم سے کریں سلوک

جانے کیسا ویرانہ چلتا ہے اپنے ساتھ

خاموشی کی کھنک سنائی دیتی رہتی ہے

اپنے آپ پہ اب تو اکثر رونا آتا ہے

دن بیتے جب اپنے آپ پہ ہنستے رہتے تھے

فرحت عباس شاہ

**********************

اس نے گردن تان کے جھمکے لہرائے

چاند نے جھک کر کانوں میں سرگوشی کی

چھو لیتا ہوں خوشبو کو آسانی سے

پھولوں کی آوازیں سنتا رہتا ہوں

ہر اک شاخ پہ خنک ہوا کی پازیبیں

چھن چھن چھنا چھن چھنن چھنکتی رہتی ہیں

ساون میں جب موسم نے انگڑائی لی

بادل برسے ہم نے تم کو یاد کیا

ہمیں سلگتی آنکھوں کے سہلانے کو

تتلی کے پر اور تمہارا لمس بہت ہے

فرحت عباس شاہ

**********************

اگر میں کشتیوں کا سوگ ہوتا

سمندر تک تمہارا ساتھ دیتا

تمہیں صحراؤں سے میں لے تو آؤں

مگر شہروں میں آزادی نہیں ہے

میں دوئی سے بہت ڈرنے لگا ہوں

تمہارا روگ مجھ کو لگ گیا ہے

اجل سے پیار سب دھوکہ ہے ورنہ

ہمارا مسئلہ تو زندگی ہے

کسی نے کیا کہا ایسا کہ تو نے

پرانے سارے رشتے توڑ ڈالے

فرحت عباس شاہ

**********************

ایک ایسا بھی مقام آتا ہے غم میں یارو

آدمی صبر کرے گر تو ولی ہو جائے

فرحت عباس شاہ

**********************

دیپ رکھے تھے بہت سے گھر میں

رات آئی تو جلائے نہ گئے

آپ کے دم سے مری دنیا ہے

آپ اس دنیا میں آئے نہ گئے

ہجر تو ہجر ہوا کرتا ہے

آپ کہتے ہیں کہ روتے کیوں ہو

ساتھ چلتا ہے سفر کی صورت

یاد آتا ہے شجر کی صورت

وہ جو نزدیک سے گزرا میرے

کوئی پہچان چٹخ کو ٹوٹی

فرحت عباس شاہ

**********************

ہم نے اشکوں سے کبھی پوچھا نہ تھا

کس لیے بہتے رہے رخسار پر

بے سبب رونا بھی کوئی بات ہے

چبھ گئی ہوگی کوئی شے روح میں

رات کی دیوی تجھے معلوم ہے

کب بھلا ہم نے تری پوجا نہ کی

تو جدائی کی طرح ڈستی رہی

ہم سہیلی کی طرح ہنستے رہے

ایک غم ہو کوئی تو بتلائیں بھی

کھو گیا ہے دل ہجومِ درد میں

فرحت عباس شاہ

**********************

بے چینی کا باعث ہو گی

آسائش خواہش کے اندر

پیلے پتوں والے پودے

جانے کس سے بچھڑ چکے ہیں

وقت کے تیور دیکھ رہا ہوں

کافی خون خرابہ ہو گا

نیلے نینوں والے فرحت

جھیلوں کی نگری کے ہوں گے

اس سے تو بہتر ہی ہوتا

صاف جواب ہی دے دینا تھا

فرحت عباس شاہ

**********************

ایک کے نتیجے میں پھیلتی گئی گنتی

انگلیاں بھی تھوڑی ہیں اور حساب بھی کم ہیں

بے شمار تارے ہیں بے شمار آنکھیں ہیں

بے خیال گنتی میں رات ڈوب جاتی ہے

چھوڑ کر چلے تو ہو تجربے کی خواہش میں

تم نے یہ نہیں سوچا میں تمہارا موسم ہوں

ہم بہت ہی کافر ہوں تم کو منہ لگائیں تو

تم نہ کوئی رستہ ہو تم نہ کوئی راہی ہو

تم کو لوٹ جانا تھا لوٹ ہی گئے آخر

آدمی کی صحبت میں آدمی ہی رہتا ہے

فرحت عباس شاہ

**********************

نیند کا پرندہ بھی کیا عجب پرندہ ہے

دیر دیر تک اپنے آشیاں میں اڑتا ہے

خواب کے زمانوں میں خوب نیند آتی تھی

رتجگوں کا موسم ہے آنکھ کے جہانوں میں

سبز چادروں والے لوٹ کیوں نہیں آتے

اور دوسرے گاؤں چھوڑ کیوں نہیں جاتے

تم ہمارے بن کیا ہو ہم تمہارے بن کیا ہیں

کائنات کے اندر کائنات سے باہر

جب تمہارے بارے میں بات ہونے لگتی ہے

دور جا نکلتا ہے سلسلہ سوالوں کا

فرحت عباس شاہ

**********************

ایک دریا ہے کائنات جہاں

وقت انسان کا بہاؤ ہے

حادثوں کے پہاڑ راہ میں ہیں

قافلے پھر بھی ہیں رواں کتنے

ہے بہت کچھ سفر میں مل جل کے

زندگی بھی تو ایک قافلہ ہے

سوچ کا اس لیے وجود نہیں

اس سے جاتے ہیں ماوراء کی طرف

آپ کی آنکھ نم ہے فرحت جی

آپ میرے لیے دعا کیجئے

فرحت عباس شاہ

**********************

سوچا تو مرا عکس تھا آنکھوں میں تمہاری

دیکھا تو بہت خالی نظر آئیں وہ جھیلیں

ہر روز کسی غم کی خلش کھینچ کے لائے

بچھڑے ہوئے موسم کی گزرگاہ پہ مجھ کو

اک ہجر ہے، آتا ہے جو ہر رات مرے پاس

اور پہروں کیا کرتا ہے مجھ سے تری باتیں

بے چینی کے عالم سے گریزاں تو بہت ہوں

لیکن کسی صحرا میں پڑے دل کا کروں کیا

پھر دیکھوں مرے حال پہ روتا ہے بھلا کون

ویرانیء دل آتجھے آنکھوں میں بسا لوں

فرحت عباس شاہ

**********************

زندگی یونہی تری رہ میں لیے پھرتی ہے

ورنہ یہ طفل تسلی کے سوا کچھ بھی نہیں

فرحت عباس شاہ

**********************

درد نے سب نشاندہی کر دی

چھپ گئے تھے وگرنہ ہم تم میں

اک محبت سے اک جدائی تک

بارشوں کی الگ کہانی ہے

ہم کو جو کچھ ملا ہے دنیا میں

سب تمہارا کرم ہے محرومی

تیرے غم کی اداس شاموں نے

ایک پل بھی ہمیں رہائی نہ دی

آج دیکھو کہ کس طرح ہم سے

غمزدہ لوگ پیار کرتے ہیں

فرحت عباس شاہ

**********************

تھوڑا عشق نبھا پائے 

سارا جیون بیت گیا

سارا سارا دن تیری 

باتیں کرتا رہتا ہوں

علم نہیں تھا اس دل کو 

ایسی چپ لگ جائے گی

رستہ گم ہو جاتا ہے

دل کا بوجھ نہیں جاتا 

ایک عجب بے چینی سے

سر بھاری ہو جاتا ہے

فرحت عباس شاہ

**********************

سب زخم اچانک سل جائیں

اک روز اچانک مل جائیں

ہم لوگ محبت کے روگی

خوشیوں سے گھبرا جاتے ہیں

ویرانوں کی تو بات نہ کر

کب دیوانوں سے دور ہوئے

بے چین پرندے کیا جانیں

سر سبز شجر کیا ہوتے ہیں

ہم تیرے بارے کیا بولیں

تیری ہر بات نرالی ہے

فرحت عباس شاہ

**********************

میں تم سے ناراض رہوں گا صدیوں تک

تم نے میری پریت پہ حرف اٹھایا ہے

صدیوں سے دھوکے میں ہیں دنیا والے

دل، دنیا اور دین علیحدہ رکھتے ہیں

تیری دنیا بھی کچھ روشن ہو جاتی

میری تھوڑی درد کمائی لے جاتے

کتنے مشکل دن تھے لیکن پھر بھی یار

ہم نے تیرے آگے ہاتھ نہ پھیلایا

سب دنیا تیری ہے اور رہے گی بھی

اپنا کیا ہے خالی تھے اور خالی ہیں

فرحت عباس شاہ

**********************

عالمِ انتظار ہے دنیا

تیرے بن بے قرار ہے دنیا

ایک تم ہی نہیں زمانے میں

دیکھ لو بے شمار ہے دنیا

بے کلی ہی نہیں اداسی بھی

تیری یادوں کا ساتھ دیتی ہے

جتنے بھی راز دار تھے میرے

بستیوں کی ہوا چرا لائی

خوف کے درد ناک لمحوں میں

زندگانی مجھے اڑا لائی

فرحت عباس شاہ

**********************

مر گئی زندگی کہیں اندر

روح کا ارتعاش ختم ہوا

آپ کے بس میں تھیں مری خوشیاں

آپ کے اختیار میں غم تھے

ایک میں ہی تھا اپنے آپ کے پاس

آپ نے چھین ہی لیا مجھ سے

درد کی راہ روکنے والے

اضطرابی مزاج ہوتے ہیں

ڈھونڈتے ڈھونڈتے طمانیت

تیری گلیوں میں شام ڈھل آئی

فرحت عباس شاہ

**********************

ہم اپنی ذات کے غم سے

تمہیں آباد کرتے ہیں

چلے جاؤ مرے دل سے

تجھے آزاد کرتا ہوں

اگر ہم پار لگ جائیں

تو دریا رہگزر ہی ہے

نگاہیں تو علامت ہیں

کہیں بھی جا کے جم جائیں

ہمیں برباد ہوتے ہیں

محبت تو سلامت ہے

فرحت عباس شاہ

**********************

خواہش خام کے مارے ہوئے ہم لوگوں کا

خواب اور خوف کے مابین سفر بیت گیا

فرحت عباس شاہ

**********************

ہم تری محبت میں

سوگوار رہتے ہیں

شام بھی گزاری ہے

رات بھی بتائی ہے

ہم نے اپنے سینے پر

مات بھی بتائی ہے

سانحے کی صورت میں 

ذات بھی بتائی ہے

اس نے زندگی ساری

بات ہی بنائی ہے

ان گنت مصائب ہیں

بے کراں جدائی ہے

فرحت عباس شاہ

**********************

بے شمار رہتے ہیں

اور مجھ پہ ہنستے ہیں

مجھ سے روٹھنے والے

میں ترا مسافر ہوں

عشق کے جزیرے پر

بے قرار بستے ہیں

بے سکون آنکھوں کو

خواب کی ضرورت ہے

اضطراب کا باعث 

اک تمہاری صورت ہے

فرحت عباس شاہ

**********************

اسے کہنا کہ اب جب چاند نکلے

پرانی بستیوں پر گیت لکھے

سفر کی رات ہے اور زندگی ہے

تمہاری بات ہے اور زندگی ہے

شکایت بھی نہیں آتی ہمیں تو

وگرنہ آپ پر الزام دھرتے

ہماری شام کی پرچھائیوں میں

اداسی اور بڑھتی جا رہی ہے

ہمیں الجھن بہت ہے بادلوں سے

یہ موسم کیوں یہاں ٹھہرا ہوا ہے

فرحت عباس شاہ

**********************

جس طرح سے مکیں مکان میں ہیں

ہم ترے ہجر کی امان میں ہیں

کچھ مصائب تو میری ٹوہ میں ہیں

کچھ تکالیف میرے دھیان میں ہیں

ہم تری سرد مہریوں کے سبب

اور لوگوں کے ہو گئے قائل

اک زوال آشنا زمانہ بھی

دل کو چپ چاپ کر گیا مائل

ہم تری چاہتوں کے سائل تھے

درمیاں اور لوگ حائل تھے

فرحت عباس شاہ

**********************

شہر کے ہر گلی محلے میں

حسرتوں کا عجیب عالم ہے

بے زبانی نے ڈس لیے الفاظ

کوئی بولے تو چپ سلگتی ہے

روشنی میں بھی چھپ گئے اب تو

سارے عیب و کمال لوگوں کے

لوگ دریاؤں سے رہائش کو

کشتیاں بھی نکال لائے ہیں

وہ کوئی بات بھی اگر پوچھیں

وہ جواباً سوال کرتے ہیں

فرحت عباس شاہ

**********************

ویسے تو بہت ہوتے ہیں کم لوگ مسافر

مدت سے چلے آتے ہیں ہم لوگ مسافر

اک رستہ ہے اس رستے پہ اک بھیڑ لگی ہے

اک دل ہے اور اس دل میں ہیں سو روگ مسافر

بے چینی میں انصاف بھی ممکن نہیں ہوتا

کرتے ہین کوئی اور تو ہوتا ہے کوئی اور

وہ شخص ہمیں اپنے تئیں سوچ سمجھ کے

آثار قدیمہ کی طرح چھوڑ گیا ہے

دکھ سکھ کی ریاضت بھی مرے کام نہ آئی

جس شام کی خواہش تھی وہی شام نہ آئی

فرحت عباس شاہ

**********************

کبھی تو بھی تھوڑا سا وقت دے

مری الجھنوں کو شمار کر

مری رائیگانی کی خیر ہے

ترا کاروبار تو چل پڑا

ترے سوچ سوچ کے خال و خد

مری روح دکھتی ہے رات بھر

وہ اداسیاں ہیں پڑوس میں

کہ ہوا بھی آئی ہے مضمحل

مجھے مت دلا یہ یقیں وقیں

تری بات بات میں چھید ہیں

ترے بعد جتنی تھکن ہوئی

میں نے تیرے کھاتے میں ڈال دی

فرحت عباس شاہ

**********************

عشق بے وجہ پسِ بام بھی آ پڑتا ہے

کام کے ساتھ ترا نام بھی آ پڑتا ہے

فرحت عباس شاہ

**********************

بہت ہی مطمئن ہے تُو

مری پرواز سے غافل

تری آنکھوں سے دیکھوں تو

ستارے دور پڑتے ہیں

تمہاری لاڈلی دوری

ہماری جان سے کھیلے

کسی سے پیار کی طاقت

وسیلہ بن گئی ہوگی

وگرنہ زندگی کیا تھی

وگرنہ زندگی کیا ہے

فرحت عباس شاہ

**********************

کسی کے سامنے فرحت

ہمیں رونا نہیں آتا 

مری پلکوں کی چھاؤں میں

مری آنکھیں سلگتی ہیں

مرے اشکوں کے اولے تو

مرے سینے میں گرتے ہیں

اسے کہنا کہ ہاتھوں کی

لکیریں جھوٹ کہتی ہیں

اسے کہنا ترا میرا

تعلق اجنبیت ہے

فرحت عباس شاہ

**********************

جدائی کی طرح لمحے بھی کانٹے بن کے چبھتے ہیں

جدائی کی طرح رسمیں بھی رستے سے نہیں ہٹتیں

تمہارے تذکرے میں تھے مقامات سخن ایسے

وہاں ہم یوں رکے جیسے کوئی ساون سے ڈرتا ہو

کناروں کے کنارے پر کوئی بستی بسانی تھی

ہمارے اشک پلکوں پر ٹھہر کر سوچتے رہتے

تمہیں ملنا ضروری تھا یا شاید بے قراری تھی

ہم اپنے آپ کو دھوکےے میں رکھ کر دوڑ پڑتے تھے

ہمارے حوصلے تو نیند کےعالم میں اکثر ہی

تمنا کے در و دیوار سے ٹکراتے رہتے تھے

فرحت عباس شاہ

**********************

تمام رات سفر سے گلہ رہا ہم کو

گھسٹ گھسٹ کبھی پڑتا کبھی ٹھہر جاتا

عجیب کوئی اذیت پسند تھا وہ بھی

کہ عین ہجر کی بے چینیوں میں یاد آتا

تمہارے بعد بھی گھر تک پہنچ نہیں پائے

تمہارے بعد ہمیں راستوں نے گھیر لیا

کسی طرح سے بھی ممکن نہ تھا کہ تیرے بنا

ہم اردگرد کے لوگوں سے رابطہ رکھتے

نحہف سانس کا کیا ہے کہ کوئی لمحہ بھی

ذرا جھٹک کے تسلسل ہی توڑ دے اس کا

فرحت عباس شاہ

**********************

پرواز نے وہ بات ہی پائی نہ تھی ورنہ

ہم روز ترے خواب کی کھڑکی میں اترتے

حد درجہ تغافل سے نکلتی ہی نہیں ہے

حد درجہ مسائل میں گھری روح تو دیکھو

اک راستہ کیا بند ہوا تھا کہ پھر اس پر

سو راہ سے آئے ترے دیوانے نگر میں

کیا شور مچایا تھا درختوں نے فضا میں

ہم نے تری خاموشی سے اک بات کہی تھی

یک گونہ طمانیتِ احساس کی خاطر

ہم روز نکل پڑتے ہیں بے چین گھروں سے

فرحت عباس شاہ

**********************

رستہ کافی مشکل ہے

تنہائی آہستہ چل

دل کو ڈستا رہتا ہے

اپنی بے چینی کا غم

ہم دل والے دور ہوئے

اپنے اپنے مرکز سے

فیض تھا تیری دوری کا

نگر نگر بھٹکا ہے دل

دور کہیں آباد ہوئے

دل میں بسنے والے لوگ

فرحت عباس شاہ

**********************

نیند کا شائبہ در آیا ہے بیداری میں

آپ کچھ دیر کو جاگیں تو ذرا سو جاؤں

فرحت عباس شاہ

**********************

میں بہت دور ہی سہی تجھ سے

تو مرے آس پاس رہتا ہے

کوئی بھی شور ادھر نہیں رہتا 

وہ مرے آس پاس رہتا ہے

ایک ہی دل ہمارا ہے ساتھی

اور یہ بھی اداس رہتا ہے

دل کا عالم ہے ایک دریا سا

دوکناروں میں درد بہتا ہے

غم تو گویا کوئی سمندر ہے

جانے کیا کیا ہے اس جہان میں گم

میری نظریں جسے تلاش کریں

اک ستارہ ہے آسمان میں گم

پار لگتے نظر نہیں آتے

ہر کنارا ہے بادبان میں گم

فرحت عباس شاہ

**********************

خواب میں پاگل ہوائیں ڈس گئیں

بندھ گیا پیروں سے زہریلا سفر

خوف کے مارے ہوئے لاچار ہیں

رات یوں جاگے کہ پھر سوئے نہیں

کھل کے رونے کو بھی طاقت چاہئیے

آنکھ خالی تھی سو ہم روئے نہیں

اے اداسی ہم ترے محصور ہیں

اے جدائی ہم ترے بیمار ہیں

دل کی نچلی تہہ میں بیٹھا تھا کوئی

ہم نے یہ سمجھا سمندر صاف ہے

یاد کی آوارگی تو دیکھئیے

آن پہنچی درد سے دہلیز تک

فرحت عباس شاہ

**********************

لگ تو یہی رہا تھا کہ تنہا نہیں ہوں میں

دیکھا تو شہر بھر تھا مرے دشمنوں کے ساتھ

اب جانے کون کون مرے پاؤں چوم لے

رکھے ہوئے ہیں میں نے قدم اختیار میں

ایمان بھی ہے ہمتِ مرداں بھی مجھ میں ہے

اے مفلسی ٹھہر جا مرا اعتماد کر

مدت کے بعد دیکھا ہے فرحت کو خواب میں

صورت سے لگ رہا تھا کہ بیمار ہے بہت

ہر سو جلا دیے ہیں ترے درد کے دیے

ہم نے تمہارے شہر کو آباد کر دیا

فرحت عباس شاہ

**********************

آنکھوں میں چبھن بے چین شجر

رستوں میں پھرے بیمار ہوا

سورج کی قسم صحرا کی طرح

بے آب و گیاہ ہے شہر بہت

جنگل جنگل کوئل روئے

صحرا صحرا ارمان ہنسیں

بستی کے پریمی لوگوں پر

ان کے اپنے پیمان ہنسیں

اک پت جھڑ تیری یادوں کی

آئی اور آ کر ٹھہر گئی

فرحت عباس شاہ

**********************

شہر والوں میں مرے ہونے کے

تذکرے ہوتے رہیں اچھا ہے

فرحت عباس شاہ

**********************

ہم ترے ساتھ موت تک جاتے

راہ میں راستوں نے روک لیا

ہم تجھے کھوج ڈالتے لیکن

راہ میں خواہشوں نے روک لیا

اب دعا بدعا میں فرق کہاں

آہ میں ہی نہیں اثر باقی

اب مری روح میں ہیں ہم دونوں

ایک تو میں ہوں ایک ڈر باقی

ایک بس چھت ہے اس کی یادوں کی

کوئی دیوار ہے نہ در باقی

شہر میں ان گنت مکان تو ہیں

کوئی گھردار ہے نہ گھر باقی

روح پر عشق کے نشان تو ہیں

میرے اندر کئی جہان تو ہیں

فرحت عباس شاہ

**********************

خوف ہجرت کا بن رہا ہے سبب

ہو رہے ہیں کئی مکاں خالی

آرزوؤں کی زرد بستی میں

سو رہے ہیں کئی مکاں خالی

کوئی آتا نہیں ہے رہنے کو

رہ رہے ہیں کئی مکاں خالی

ایسا لگتا ہے شام ڈھلتے ہی

لوٹ جاتا ہے آسماں خالی

لوٹ کر لے گیا فقیر مرا

کر گیا ہے وہ آستاں خالی

فرحت عباس شاہ

**********************

تم تو آسمانوں پر

چاند جیسے لگتے ہو

عشق پھیل جاتا ہے

ان گنت زمانوں پر

پُر سکوت آنگن میں

تیرا نام بھی چپ ہے

اے ہوا سلامی دے

اشک لوٹ آئے ہیں

دل کی رہگزاروں پر

درد ہی مسافر ہے

دور دور تک شاید

گرد ہی مسافر ہے

موت کی طرف شاید

فرد ہی مسافر ہے

فرحت عباس شاہ

**********************

آزمائش میں ہے احساس زیاں

لگ گیا غم تو سمجھ لو کہ گئے

فرحت عباس شاہ

**********************

آج کل اپنی زندگانی کا

حال بھی سرد رات جیسا ہے

ایک چپ ہے پڑوس میں رہتی

ایک ویرانہ گھر کے اندر ہے

دوسروں سے موازنہ کر کے

کیوں فلک سے ہمیں گراتے ہو

دشمنوں کے لیے ہمارے ہاں

آزمائش کڑی نہیں کوئی

ایک سو اک فریب کھایا ہے

تب کہیں جا کے کچھ نظر آیا

فرحت عباس شاہ

**********************

میں اپنی تنہائی سے

تیرا ساتھ نبھاؤں گا

تیرے آنسو چوموں گا

اپنی صحرا آنکھوں سے

اپنی ویراں آنکھوں میں

شبنم لے کر آؤں گا

پیش کروں گا پھولوں کو

اپنی زرد ہتھیلی پر

دل کی اجڑی بستی کی

خاک پہن کر آؤں گا

تیری مانگ سجا دوں گا

اجڑی ہوئی تسلی سے

تیرا درد بٹانے کو

میرے پاس بہت کچھ ہے

راتوں کی ویرانی سے

تیری جھولی بھر دوں گا

فرحت عباس شاہ

**********************

سوکھے سڑے درختوں پر

برگ و بار نہیں آتے

تیرے آنے سے پہلے

بے چینی آ جاتی ہے

چشم نم آوارہ ہے

ساون ساون پھرتی ہے

جیون اور ہمارے بیچ

ایسی کوئی بات نہیں

میں بھی کہہ دوں گا اس کو

شام مری ہمسائی ہے

اس کی میری آپس میں

اچھی خاصی بنتی ہے

ملنا ہو تو بتلانا

شام تجھے لے آئے گی

فرحت عباس شاہ

**********************

لکھ رکھے ہیں کئی نامے تم کو

منتظر ہیں کہ ہوا لے جائے

فرحت عباس شاہ

**********************

زہر کے ساتھ ساتھ ہی اس میں

سانپ کی سی ملائمت بھی ہے

جو بظاہر تھا ہم وہی سمجھے

اور وہ دل میں اور کوئی تھا

راستوں کی عجیب عادت ہے

میرے پیروں سے آ لپٹتے ہیں

ایک مدت سے ہم نے خود اپنی

آستینیں ادھیڑ ڈالی ہیں

یہ تو فطرت کی کوئی مستی ہے

ساز پر کون مست ہوتا ہے

فرحت عباس شاہ

**********************

یاد اک مہربان دشمن ہے

وار کرتی ہے دل پہ ہنس ہنس کر

آنسوؤں کی قسم تمہارے لیے

ہم نے وہ بھی کیا جو بس میں نہ تھا

بد نصیبوں کی آرزو ہی کیا

آنسوؤں میں پناہ ڈھونڈتے ہیں

تم تو تھے ہی نصیب کے ایسے

آزمائش بھرم گنوا بیٹھی

تم کو دیکھا نہیں تو بینائی

روشنی کے لیے ترستی ہے

فرحت عباس شاہ

**********************

خلقت کو معلوم نہیں

ہم گمنام قلندر ہیں

دل دنیا تو دنیا ہے

بہت زیادہ روشن ہے

گھر گھر اندر آپس میں

جنگیں ہوتی رہتی ہیں

خدشوں کی تو بات نہ کر

خواب میں بھی گھس آئیں گے

اتنے پیارے چہرے پر

کتنے روپ سجاؤ گے

فرحت عباس شاہ

**********************

سو طرح کی خواہشوں کے نام پر

دل کہ اپنا آپ منواتا رہا

کس طرح تیرے لیے کرتے دعا

ہم جو صحرا کی طرح زندہ رہے

ہم نہ جوگی ہیں نہ مجنوں ہیں مگر

عشق کی دہلیز سے اٹھے نہیں

رات تیرے واسطے اک خواب میں

میں ستارے توڑ لایا تھا بہت

آنکھ ان راہوں پہ جاتی ہی نہیں

جن پہ تیرے نام کے کتبے نہیں

آسرا دیتے رہے تم تو سنو

ہم ذرا کچھ اور جی لیں گے یہاں

تم ستارا تھے نہ سورج تھے مگر

تم نے روشن کر دیا ماتھا مرا

فرحت عباس شاہ

**********************

فیصلے کی گھڑی سے پہلے ہی

کس لیے ہو گئے ہو سوچ میں گم

اک ذرا دو قدم اٹھاتا ہوں

رہگزاریں ٹھہرنے لگتی ہیں

اس کی خاطر بھٹک رہے ہو تو

ایک ہی شہر میں بھٹکنا کیا

دل ترا نام لیتا رہتا ہے

آنکھ برسات گنتی رہتی ہے

بوجھ سی بن گئی تھی مدت سے

رائیگانی اتار پھینکی ہے

فرحت عباس شاہ

**********************

سات سمندر دنیا کے

میرے عشق سے چھوٹے ہیں

آسمان کی باتوں میں

طفل تسلی زیادہ ہے

آسمان اک دھوکہ ہے

ورنہ سایہ بھی کرتا

یاد ہے کبھی درختوں پر

نام لکھا کرتے تھے ہم

اس کا میرا رشتہ تو

آپس کی ویرانی تھی

فرحت عباس شاہ

**********************

پرورش پائے گھروں کے اندر

خوف اولاد بنا پھرتا ہے

اس قدر خدشے ہیں لاچاری کے

جال تن جاتا ہے بیماری پر

دشمنی مول لیے پھرتا ہوں

تیری خاطر بھرے بازاروں میں

خود کو جتنا بھی کیے ہوں مضبوط

زندگی توڑ کے رکھ دیتی ہے

بات اگر خوف کی ہوتی ہے تو اب

رات اور دن میں کوئی فرق نہیں

فرحت عباس شاہ

**********************

خیالوں کے سمندر کے لیے ساحل ضروری ہے

وگرنہ لوٹ آنے کی خوشی بے کار ہو جائے

تمہیں آباد گھر اچھا نہیں لگتا تھا سو ہم نے

کوئی رونق نہیں رہنے دی دل کے درد خانے میں

مجھے ویرانیاں کچھ اس لیے بھی راس آتی ہیں

وہاں اک اک نشانی میرے اندر کی نشانی ہے

کہانی کا سرا جو تم سے جا ملتا تھا ماضی میں

کسی گنجل میں یوں گم ہو گیا ہے جیسے دکھ سکھ ہو

دکھوں کی اپنی اپنی بولیاں ہیں دل کی دنیا میں

مرے زخموں سے تیرا دکھ گلے لگ لگ کے رویا ہے

فرحت عباس شاہ

**********************

کشتیاں ساحلوں پہ لوٹ آئیں

اس طرف دور تک سمندر تھا

کیا کریں ہم تمہارے آوارہ

بند گلیاں اگر نصیب میں ہوں

طائران قفس نصیب ہیں ہم

پھڑ پھڑانا خوشی سمجھتے ہیں

احتراماً اداس لوگوں کی

بستیوں میں قدم نہیں رکھتے

وارداتِ سفر سے واقف ہوں

آبلوں کو شمار کیا کرنا

آپ کو دیکھ بھی لیا ہوتا

آئینوں سے پرے نہیں جھانکا

شہر سہما ہوا ہے یوں گویا

ہم کسی خوف کے غلام ہوئے

مدتوں بعد ہم نے جانا ہے

یہ خدا بھی کوئی ریاضت ہے

فرحت عباس شاہ

**********************

اختتام

**********************

بارشوں کے موسم میں

**********************

فرحت عباس شاہ

**********************