kook mere dil kook

کُوک مرے دل کُوک

ہر سینے کونے چار

ہر کونے درد ہزار

ہر درد کا اپنا وار

ہر وار کی اپنی مار

ترے گردو پیش ہجوم

کئی سورج، چاند، نجوم

ہر جانب چیخ پکار

تری کوئی سنے نہ ہوک

کبھی کُوک مرے دل کُوک

ہر سینے آنکھیں سو

ہر آنکھ کی اپنی لو

پر پوری پڑے نہ ضو

کبھی پھوٹ سکی نہ پو

ترے صحن اندھیرا گھپ

تری اللہ والی چپ

ترے مٹی ہوگئے جو

تری کون مٹائے بھوک

کبھی کُوک مرے دل کُوک

ہر سینے سو سو جنگ

تری سانس کے رستے تنگ

ترا نیلا پڑ گیا رنگ

ترے نت نرالے ڈھنگ

لمحوں کے خنجر تیز

ہر دھار اذیت خیز

ترا نازک اک اک انگ

ترا اک اک تار ملوک

کبھی کُوک مرے دل کُوک

کبھی کُوک مرے دل کُوک

فرحت عباس شاہ

مکمل تحریر >>>

mera shaam saloona shah piya

مرا شام سلونا شاہ پیا

کبھی جڑوں میں زہر اتار لیا

کبھی لبوں کے پیچھے مار لیا

اس ڈر سے کہ درد کی شدت میں

کہیں نکل نہ جائے آہ پیا

مرا شام سلونا شاہ پیا

ہمیں جنگل جنگل بھٹکا دو

ہمیں سولی سولی لٹکا دو

جو جی سے چاہو یار کرو

ہم پڑ جو گئے تری راہ پیا

مرا شام سلونا شاہ پیا

کہیں روح میں پیاس پکارے گی

کہیں آنکھ میں آس پکارے گی

کہیں خون کہیں دل بولے گا

کبھی آنا مقتل گاہ پیا

مرا شام سلونا شاہ پیا

تری شکل بصارت آنکھوں کی

ترا لمس ریاضت آنکھوں کی

ترا نام لبوں کی عادت ہے

مری اک اک سانس گواہ پیا

مرا شام سلونا شاہ پیا

ہمیں مار گئی تری چاہ پیا

فرحت عباس شاہ

مکمل تحریر >>>

saiyan zaat adhoori hai

سائیاں ذات ادھوری ہے 

سائیاں ذات ادھوری ہے 

سائیاں بات ادھوری ہے

سائیاں رات ادھوری ہے

سائیاں مات ادھوری ہے

دشمن چوکنا ہے لیکن

سائیاں گھات ادھوری ہے

سائیاں تیرے گاؤں میں

دکھ کی سیاہ فضاؤں میں

نا مانوس ہواؤں میں

لوگوں اور بلاؤں میں

قید ہوئے ہیں مدت سے

ہم نے کار دعاؤں میں

سائیاں رنج ملال بہت

دیوانے بے حال بہت

قدم قدم پر جال بہت

پیار محبت کال بہت

اور اسی عالم میں سائیاں

گزر گئے ہیں سال بہت

سائیاں ہر سو درد بہت

موسم موسم سرد بہت

رستہ رستہ گرد بہت

چہرہ چہرہ زرد بہت

اور ستم ڈھانے کی خاطر 

تیرا اک اک فرد بہت

سائیاں تیرے شہر بہت

گلی گلی میں زہر بہت

خوف زدہ ہے دہر بہت

اس پر تیرا قہر بہت

کالی راتیں اتنی کیوں 

ہم کو ایک ہی پہر بہت

سائیاں دل مجبور بہت

روح بھی چور و چور بہت

پیشانی بے نور بہت

اور لمحے مغرور بہت

ایسے مشکل عالم میں

تو بھی ہم سے دور بہت

سائیاں راہیں تنگ بہت 

دل کم ہیں اور سنگ بہت

پھر بھی تیرے رنگ بہت 

خلقت ساری دنگ بہت

سائیاں تم کو آتے ہیں

بہلانے کے ڈھنگ بہت

سائیاں میرے تارے گم 

رات کے چند سہارے گم

سارے جان سے پیارے گم 

آنکھیں گم نظارے گم

ریت میں آنسو ڈوب گئے

راکھ میں ہوئے شرارے گم

سائیاں میری راتیں گم

ساون اور برساتیں گم

لب گم گشتہ باتیں گم

بینائی گم جھاتیں گم

جیون کے اس صحرا میں

سب جیتیں سب ماتیں گم

سائیاں جان بیمار ہوئی

صدموں سے دو چار ہوئی

ہر شے سے بیزار ہوئی

ہر اک سپنا سنگ ہوا

ہر خواہش دیوار ہوئی

سائیاں رشتے ٹوٹ گئے

سائیاں اپنے چھوٹ گئے

سچ گئے اور جھوٹ گئے

تیز مقدر پھوٹ گئے

جانے کیسے ڈاکو تھےجو

لٹے ہوئوں کو لوٹ گئے

سائیاں خواب اداس ہوئے

سرخ گلاب اداس ہوئے

دل بے تاب اداس ہوئے

دور سحاب اداس ہوئے

جب سے صحرا چھوڑ دیا

ریت سراب اداس ہوئے

سائیاں تنہا شاموں میں

چنے گئے ہیں باموں میں

چاہت کے الزاموں میں

شامل ہوئے ہے غلاموں میں

اپنی ذات نہ ذاتوں میں

اپنا نام نہ ناموں میں

سائیاں ویرانی کے صدقے 

اپنی یزدانی کے صدقے

جبر انسانی کے صدقے

لمبی زندانی کے صدقے

سائیاں میرے اچھے سائیاں 

اپنی رحمانی کے صدقے

سائیاں میرے درد گھٹا

سائیاں میرے زخم بجھا

سائیاں میرے عیب مٹا 

سائیاں کوئی نوید سنا

اتنے کالے موسم میں 

سائیاں اپنا آپ دکھا

سائیاں میرے اچھے سائیاں

سائیاں میرے دولے سائیاں

سائیاں میرے پیارے سائیاں

سائیاں میرے بیبے سائیاں

فرحت عبّاس شاہ

مکمل تحریر >>>

Army chief ka bawaqar fesla : daily city 42 column : farhat abbas shah

آرمی چیف کا باوقار فیصلہ

(ڈیلی سٹی 42 کالم : فرحت عباس شاہ)

****************

دُنیا کے بہت سارے دانشوروں کو یہ سُن کر مایوسی ہوئی کہ پاکستان کے موجودہ آرمی چیف جنرل راحیل شریف نے مدت ِ مُلازمت میں توسیع سے انکار کردیا ہے۔ کتنی بد نصیبی کی بات ہے ہم ایسے دور میں سانس لے رہے جب ہرطرف حصول ِ توسیع جائداد سے لیکر حصولِ توسیع اختیار و اقتدار کے لیے مارے مارے پھرنے والے لوگ کہیں سے انکار سُنتے ہیں تو انہیں اپنے کانوں پر یقین نہیں آتا۔ حالانکہ پوری دُنیا میں اصول و قوائد بنائے ہی اسی لیے جاتے ہیں کہ ہر انسان اپنی ناک کی حد تک آزادی کا لطف اُٹھائے اور جہاں سے کسی دوسرے کی حد شروع ہو وہاں بریک لگا دے ۔ جنرل راحیل شریف نے جس وقار کے ساتھ اپنے عہدے کی باگ ڈور سنبھالی اور جس طرح ایک خالص سپاہی کی طرح اپنے پیشہ ورانہ فرائض سنبھالے اسی معتبر طریقے سے اپنے ٹائم پر ریٹائرمینٹ کا اعلان کیا ہے۔ اس سے نہ صرف اُن کی ذاتی عزت میں اضافہ ہوا ھے بلکہ پاک افواج کے ادارے کی ساکھ میں چار چاند لگے ہیں۔

بریگیدئر حامد سعید نے اپنی کتاب ، " سیاست، ریاست اور قیادت " میں پاکستان کے اندر لگنے والے مارشل لاز کی وجوہات بیان کرتے ہوئے لکھا ہے کہ ملک کے بیشتر سیاستدان اور اُن کے چہیتے دانشور جب اقتدار میں نہیں ہوتے تو واویلا مچاتے ہیں کہ اگر آرمی نے اقتدار نہ سنبھالا تو ملک کو انتہائی خطرات لاحق ہونے کا اندیشہ ہے۔ اور جب آرمی ملک کی باگ ڈور سنبھالتی ہے تو شور مچانے لگ جاتے ہیں کہ آرمی کا کام تو سرحدوں کی حفاظت کرنا ہے۔ 

بنیادی بات یہی ہے کہ ملک میں سیاسی صورتحال بگاڑنے میں کسی نہ کسی زاویہ سے سیاستدان ہی سرگرم عمل پائے گئے ہیں۔ پچھلے دنوں ایک ٹی وی پروگرام میں شیخ رشید صاحب فرما رہے تھے کہ اگرچہ آرمی چیف کا ایکسٹینشن نہ لینے کا فیصلہ اُن کی ذات اور ادارے کے لیے بہت بہتر ہے لیکن ابھی ملک کو اُن ضرورت ہے۔ میرے خیال میں ھمارے ملک کو اس وقت سب سے زیادہ قوائد و ضوابط کی پابندی کرنے کی مثالیں سیٹ کرنے کی ضرورت ہے۔ ہم ایک ایسے بے ربط ، بے قائدہ اور بے اصول معاشرے میں بدلتے جا رہے ہیں جس کی کوئی کل سیدھی ہوتی نظر نہیں آتی۔ ہم اپنے فرائض اور ذاتی دلچسپی میں فرق کرنے سے قاصر ہوچکے ہیں۔ قومی مفاد بھی ذاتی مفاد کی بھینٹ چڑھتا نظر آتا ہے۔ ایسے حالات میں اگر ملک کا اتنا اہم عہدیدار اصولی فیصلہ کرتا ہے اور ذاتی دلچسپی یا کچھ احباب کی ذاتی رائے پر ادارے کے قوائد اور عزت کو ترجیح دے رہا ہے تو یہ نہایت خوش آئیند ہے بلکہ ھماری اپنے ملک کے بارے میں خوش امیدی کو تقویت دینے والا ہے

آخر میں تین شعر آپ کی نذر 

لگ رہا ہے شہر کے آثار سے

آ لگا جنگل در و دیوار سے

راستوں پر گھاس اُگ آئی اگر

کون لوٹے گا سمندر پا ر سے

کاٹتا ہے دُشمنِ چالاک اب

گردنوں کو گردنوں کی دھار سے

مکمل تحریر >>>

sari dunia se kata hota hai

ساری دنیا سے کٹا ہوتا ہے

جس کا ملبوس پھٹا ہواتا ہے

ہم جو سو کر بھی اٹھیں تو فرحت

جسم دردوں سے اٹا ہوتا ہے

وقت اچھا ہو تو ہر اک پتھر

میرے رستے سے ہٹا ہوتا ہے

وہ مجھے ملتی ہے جب آئندہ

پیار کچھ اور گھٹا ہوتا ہے

بات جب ہوتی ہے یک جہتی کی

شہر کا شہر بٹا ہوتا ہے

فرحت عباس شاہ

مکمل تحریر >>>

aye hain chalo kuch to mere kaam kinaray

آئے ہیں چلو کچھ تو مرے کام کنارے

میں آج سے کرتا ہوں ترے نام کنارے

بڑھنے نہیں دیتے اسے اک گام کنارے

دریا کے لیے ہوتے ہیں الزام کنارے

دریا سے لگا بیٹھے ہیں دل جب سے دوانے

تب سے انہیں لگتے ہیں در و بام کنارے

اشکوں میں ستاروں کی چمک دیتی ہے پہرا

آنکھوں میں اتر آتے ہیں جب شام کنارے

لہروں کو اگر حَد میں نہ رکھیں گے تو فرحت

کر دوں گا میں آئندہ سے نیلام کنارے

فرحت عباس شاہ

مکمل تحریر >>>

tera wajood to mera gumaan doob gya

ترا وجود تو میراگمان ڈوب گیا

افق میں دور کہیں آسمان ڈوب گیا

بھری ہیں جس طرح آنکھیں ہماری اشکوں سے

ہمیں تو لگتا ہے سارا جہان ڈوب گیا

ہوا سے رابطہ کرنے کی دیر تھی اور پھر

سمندروں میں مرا بادبان ڈوب گیا

ترا خیال ابھرتا نہیں لبوں سے مرے

مری پناہ میں مرا سائبان ڈوب گیا

یہیں کہیں کوئی رویا ہے بیٹھ کر فرحتؔ

یہیں کہیں پہ تمہارا نشان ڈوب گیا

فرحت عباس شاہ

مکمل تحریر >>>

joonhi basti main kaheen se bhi muje dar aya

جونہی بستی میں کہیں سے بھی مجھے ڈر آیا

رات بھر خوف کی چوکھٹ پہ بسر کر آیا

ایک احساس کہ لوٹ آیا ہوں غم خانے میں

اور پھر اس پہ یہ لگتا ہے کہ میں گھر آیا

جس قدر ہجر سے بچتا ہوں میں جینے کے لیے

یہ ہمیشہ اسی شدت سے مجھے در آیا

میں کئی بار محبت میں تری جی اٹھا

میں کئی بار جدائی میں تری مَر آیا

میری قربانی بھی دیکھو کہ دکھوں کے بدلے

اپنی خوشیاں تری دہلیز پہ ہوں، دھر آیا

جانے کیونکر مجھے مصلوب کیا جاتا ہے

جانے کیوں نیزے پہ ہر بار مرا سر آیا

فرحت عباس شاہ

مکمل تحریر >>>

itna markooz hon kahani per

اتنا مرکوز ہوں کہانی پر

چونک جاتا ہوں ہر نشانی پر

میں نہیں چاہتا کہ دنیا کو

رحم آئے مری جوانی پر

میرے بس میں جو ہو تو حیف لکھوں

ظلم اور ظلمتوں کے بانی پر

میں نے اک بار دل لگایا تھا

گھر بنایا تھا ایک پانی پر

جب ترا دل مرے گا فرحت جی

کون روئے گا آنجہانی ہر

فرحت عباس شاہ

مکمل تحریر >>>

youn sajaa gham meri peshaani per

یوں سجا غم مری پیشانی پر

جس طرح چاند کوئی پانی پر

خوف آیا تھا مجھے پہلے پہل

اب تو ہنس دیتا ہوں ویرانی پر

ہو گئی ہے مجھے اب عادت سی

غصہ آجاتا ہے آسانی پر

اس لیے کرتا نہیں عقل کی بات

لوگ خوش ہوتے ہیں نادانی پر

اب تو جنگل بھی کئی بار یہاں

رو پڑے حالتِ انسانی پر

فرحت عباس شاہ

مکمل تحریر >>>

azal abad badnaam suhaagan

اَزل اَبد بدنام سہاگن

تنہائی کی شام سہاگن

جیت سکی نہ دل ساجن کا

ہوں کتنی ناکام سہاگن

میں داسی ہوں اپنے پیا کی

نیچ، کنیز، غلام سہاگن

سیج پہ گُل کی بن ساجن کے

کب آیا آرام سہاگن

پریتم ہی ہے سب کچھ تیرا

رب، رحمان اور رام سہاگن

تم نے کیوں دنیا سے چھپ کر

دل سے کیا کلام سہاگن

سدا رہے سیندور سلامت

سکھ پاؤ ہر گام سہاگن

فرحت عباس شاہ

مکمل تحریر >>>

jagna raat bhar udasi main

جاگنا رات بھر اداسی میں

اور کرنا سفر اداسی میں

شام ہوتے ہی جانے کیوں میرا

ڈوب جاتا ہے گھر اداسی میں

چھوڑو ایسی بھی کوئی بات نہیں

کوئی جاتا ہے مر اداسی میں

روزکے روز پینے والوں پر

مختلف تھا اثر اداسی میں

جانے کیا بات دل میں ہوتی ہے

کھلا رہتا ہے در اداسی میں

پھر تمہیں فون کی اجازت ہے

یاد آؤں اگر اداسی میں

اس نے بھی جان بوجھ کر اپنی

مجھ کو دی ہے خبر اداسی میں

میں تو رہتا ہوں بے نیاز بہت

اس کو لگتا ہے ڈر اداسی میں

لگنے لگتے ہیں مجھ کو تم جیسے

سارے شمس و قمر اداسی میں

فرحت عباس شاہ

مکمل تحریر >>>

main sunata hon kahani moat ki

میں سناتا ہوں کہانی موت کی

میں نے دیکھی ہے جوانی موت کی

سیدھا ہو جاتا ہے دل کے آر پار

ہجر بھی تو ہے نشانی موت کی

باقی سب کچھ دیکھ لیتا ہوں مگر

عشق اور اک ناگہانی موت کی

اور اک شکوہ سلانا ہے وہاں

میں نے اک صف ہے بچھانی موت کی

ہر طرف لاشیں ہی لاشیں ہیں یہاں

ہر طرف رُت ہے سہانی موت کی

فرحت عباس شاہ

مکمل تحریر >>>

dil k andar jan se pyaray ki tarah

دل کے اندر جاں سے پیارے کی طرح

غم کو بھی رکھا سہارے کی طرح

مرد کا آنسو تھا کیسی شان سے

آنکھ سے ٹپکا ستارے کی طرح

چپ رہا کرتا ہے میرے سامنے

سرد موسم کے نظارے کی طرح

بہہ نکلتا ہے محبت میں سدا

دل کسی دریا کے دھارے کی طرح

خواب میں اکثر بھٹکتا ہے کوئی

آدمی اک غم کے مارے کی طرح

فرحت عباس شاہ

مکمل تحریر >>>

yaad achanak koi kaam ajata hai

یاد اچانک کوئی کام آجاتا ہے

روتے روتے اب آرام آ جاتا ہے

بل آجاتا ہے لوگوں کے ماتھے پر

جب بھی فرحت تیرا نام آجاتا ہے

ہم تو ابھی آغاز میں ہوتے ہیں مصروف

اور اچانک ہی انجام آجاتا ہے

خوشیاں ڈھونڈنے نکلا ہوا دیوانہ دل

لوٹ کے روزانہ ناکام آجاتا ہے

شہر میں اب کوئی بھی اگر سچ بولے تو

میرے ہی سر پر الزام آجاتا ہے

فرحت عباس شاہ

مکمل تحریر >>>

aa kisi roz kisi dukh pe ikathay royen

آ کسی روز کسی دکھ پہ اکٹھے روئیں

جس طرح مرگ جواں سال پہ دیہاتوں میں

 بوڑھیاں روتے ہوئے بین کیا کرتی ہیں

جس طرح ایک سیاہ پوش پرندے کےکہیں گرنے سے

ڈار کے ڈار زمینوں پہ اتر آتے ہیں

چیختے شور مچاتے ہوئے کرلاتے ہوئے

اپنے محروم رویوں کی المناکی پر

اپنی تنہائی کے ویرانوں میں چھپ کر رونا

اک نئے دکھ کے اضافے کے سوا کچھ بھی نہیں

اپنی ہی ذات کے گنجل میں الجھ کر تنہا

اپنے گمراہ مقاصد سے وفا ٹھیک نہیں

قافلہ چھوڑ کے صحرا میں صدا ٹھیک نہیں

ہم پرندے ہیں نہ مقتول ہوائیں پھر بھی

آ کسی روز کسی دکھ پہ اکٹھے روئیں

فرحت عباس شاہ

مکمل تحریر >>>

shaam k paar koi rehta hai

شام کے پار کوئی رہتا ہے

ہجر اور ڈوبتے سورج کی قسم

شام کے پار کوئی رہتا ہے

جسکی یادوں سے بندھی رہتی ہے دھڑکن دل کی

اور اسے دیکھ کے سینے میں یہی لگتا ہے

جیسے ویرانے میں بیمار کوئی رہتا ہے

ہم بہت چپ بھی نہیں رہ سکتے

دور تک ڈھلتے ہوئے سائے اڑاتے ہیں مذاق

اور کہتے ہیں کہ اے زرد ادواسی والے

تم تو خاموش شجر ہو کوئی

اور جھونکے سے بھی ڈر جاتے ہو

صبح ہوتی ہے تو امید سے جی اٹھتے ہو

شام ہوتی ہے تو مر جاتے ہو

ہجر اور ڈوبتے سورج کی قسم

دور تک ڈھلتے ہوئے سائے اڑاتے ہیں مذاق

شام کے پار کوئی رہتا ہے

فرحت عباس شاہ

مکمل تحریر >>>

dekh lena k kisi dukh ki kahani to nahi

دیکھ لینا کہ کسی دُکھ کی کہانی تو نہیں

یہ جو آنسو ہیں، کہیں اُس کی نشانی تو نہیں

عشق اور درد سے بھر دیں ہیں کتابیں ہم نے

یہ جو سب کچھ ہے مری جان زبانی تو نہیں

جس طرح شہر سے نکلا ہوں میں بیمار ترا

یہ اُجڑنا ہے، کوئی نقل مکانی تو نہیں

جانتا ہوں کہ سرابوں میں گھرا ہوں یارو

دوڑ پڑتا ہوں مگر پھر بھی کہ پانی تو نہیں

بچھ گئی ہے تیرے ماتم کو جو اب قسمت سے

ہم نے یہ صف دلِ صحرا سے اُٹھانی تو نہیں

اُس نے چاہا ہے مُجھے اپنے خُدا سے بڑھ کر

میں نے یہ بات زمانے کو بتانی تو نہیں

یہ جو ہر موڑ پہ آ ملتی ہے مُجھ سے فرحت

بدنصیبی بھی کہیں میری دیوانی تو نہیں

فرحت عباس شاہ

مکمل تحریر >>>

is ghareebi main guzara nahi hota mola

اس غریبی میں گزارہ نہیں ہوتا مولا

غیب سے کوئی اشارہ نہیں ہوتا مولا

مجھ کو ہجرت کی کوئی راہ سجھا ہمت دے

مجھ سے یہ شہر گوارا نہیں ہوتا مولا

جب میں گھر جاتا ہوں انبوہِ مصائب میں کبھی

تجھ بنا کوئی سہارا نہیں ہوتا مولا

سوچتا ہوں تو ہر اک سمت سمندر ہی ملے

دیکھتا ہوں تو کنارہ نہیں ہوتا مولا

کچھ نہ کچھ پھر بھی کہیں کوئی کمی رہتی ہے

چاند ہوتا ہے ستارہ نہیں ہوتا مولا

فرحت عباس شاہ

مکمل تحریر >>>

ae dil e rayegaan udaas udaas

اے دل رائیگاں اداس اداس

پھر رہے ہو کہاں اداس اداس

چاند اک عمر سے سفر میں ہے

آسماں آسماں اداس اداس

جب بھی دیکھا ہے جھانک کر دل میں

ہو گیا سب جہاں اداس اداس

زندگی کھیل ہے اداسی کا

ہم یہاں تم وہاں اداس اداس

پھرتے رہتے ہیں ہم محبت میں

مضمحل ناتواں اداس اداس

کیا اداسی سوا نہیں کچھ بھی

اے مرے لامکاں اداس اداس

رات بھر جاگتے ہو کیوں آخر

اس طرح میری جاں اداس اداس

اک طرف غم ہیں اک طرف خوشیاں

اور میں درمیاں اداس اداس

سارے کردار ہیں محبت کے

داستاں داستاں اداس اداس

یہ وہی ہیں ہمارے فرحت جی

شاعرِ بے کراں اداس اداس

ہم سے حساس لوگ فرحت جی

رہ رہے ہیں یہاں اداس اداس

فرحت عباس شاہ

مکمل تحریر >>>

mera intizar qadeem hai

مرا انتظار قدیم ہے

مرا تم سے پیار قدیم ہے

مرے پھوٹے ہوئے نصیب پر

ترا اختیار قدیم ہے

مرے ساتھ دکھ میں ہے آسماں

مرا سوگوار قدیم ہے

فرحت عباس شاہ

مکمل تحریر >>>

gum naam deyaron main safar kiu nahi kartay

گمنام دیاروں میں سفر کیوں نہیں کرتے

اجڑے ہوئے لوگوں پہ نظر کیوں نہیں کرتے

یہ خواب یہ خوشیوں بھرے ہنستے ہوئے یہ خواب

یہ خواب مرے دل پہ اثر کیوں نہیں کرتے

کیوں آپ اٹھاتے ہو اداسی کے یہ اسباب

شاموں کے غلاموں کو خبر کیوں نہیں کرتے

فرحت عباس شاہ

مکمل تحریر >>>

das farhat shah asee ki kariye

بُجھارت

دس فرحت شاہ اسیں کی کریے

ساڈا کوئی نہ لاوے مُل

اسیں نازاں پلّے ماپیاں دے

اَج گئے وٹیاں وچ رُل

کئی چنگے بھیڑے رَل مل کے

سانوں رَج کے پھیرَن جھُل

اِنج ہاسے ساڈے ہوٹھاں تے

جیویں قبراں اُتّے پھُل

اِنج ہنجو ساڈی اکھیاں چوں

جیویں موگھے جاوَن کھُل

**************

دس فرحت شاہ اسیں کی کریے

ساڈے شہر اِچ کالی رات

ساڈے رشتے ناتے بھیڑیاں نل

ساڈی ٹھگاں نل گل بات

ساڈے سِر تے چھبّا گِٹکاں دا

ہتھّ چھلڑاں بھری پرات

ساڈے کپڑے آ آ سب ویکھن

ساڈی کوئی نہ پُچھے ذات

سانوں ڈر گلیاں وچ سَد مارن

سانوں حدشے پاون جھات

**************

دس فرحت شاہ اسیں کی کریے

سانوں چین نہ امن قرار

کوئی بھانبھڑ بلدائے ہر راتیں

ساڈے سینے دے وچکار

سانوں رستے کھاون اَمدے ہن

ساڈے ساہ گھُٹدِن گھر بار

ہِک پیڑ اجیہی چُپ کیتی

کرے لہو دے وچ سُرکار

ہِک یاد اساڈے دل دے وچ

جیویں دو دھاری تلوار

**************

دس فرحت شاہ اسیں کی کریے

فرحت عباس شاہ

مکمل تحریر >>>

shehr e veeran k darwazay se lag kar roye

شہر ویران کے دروازے سے لگ کر روئے

اپنی پہچان کے دروازے سے لگ کر روئے

اتنا پتھر تھا مکاں اس کا کہ یوں لگتا تھا

ہم بیابان کے دروازے سے لگ کر روئے

اب تو ہم کتنی دفعہ آنکھوں کی عادت کے طفیل

غم کے امکان کے دروازے سے لگ کر روئے

اب اگر ٹوٹ گئے ہو تو شکایت کیسی

کیوں کسی مان کے دروازے سے لگ کر روئے

ہم ستائے ہوئے دنیا کے ترے بعد اکثر

تیرے احسان کے دروازے سے لگ کر روئے

کوئی آواز تسلی نہ دلاسہ نکلا

کیسے انسان کے دروازے سے لگ کر روئے

ہم نے کب دل سے کہا تھا بھری برساتوں میں

تیرے پیمان کے دروازے سے لگ کر روئے

دل کے دروازے پہ روئے تو لگا ہے فرحت

جیسے زندان کے دروازے سے لگ کر روئے

فرحت عباس شاہ

مکمل تحریر >>>

deeda e num main sukoon dhoondtay hain

دیدہ نم میں سکوں ڈھونڈتے ہیں

ہم ترے غم میں سکوں ڈھونڈتے ہیں

شہر بھر سے ہیں مراسم اپنے

پھر بھی کم کم میں سکوں ڈھونڈتے ہیں

ہم بہت ہیچ عزادار ترے

تیرے ماتم میں سکوں ڈھونڈتے ہیں

لوگ گھبرائے ہوئے بارش کے

خشک موسم میں سکوں ڈھونڈتے ہیں

آپ کے نام میں سکھ پاتے ہیں

آپ کے دم میں سکوں ڈھونڈتے ہیں

تجھ سے ہم اس لیے ملتے ہیں بہت

ربطِ پیہم میں سکوں ڈھونڈتے ہیں

فرحت عباس شاہ

مکمل تحریر >>>

an ginat be hisaab aan basay

ان گنت بے حساب آن بسے

آنکھ اجڑی تو خواب آن بسے

دل عجب شہر ہے محبت کا

ہر گلی میں سراب آن بسے

اس سے اچھا تھا تم ہی رہ جاتے

تم گئے اور عذاب آن بسے

تیرے آنے کی رت سے پہلے ہی

کیاریوں میں گلاب آن بسے

آنکھ میں آ کے بس گئے آنسو

آنسوؤں میں سحاب آن بسے

فرحت عباس شاہ

مکمل تحریر >>>

khoo gaye ho yeh tum kahan jaanan

کھو گئے ہو یہ تم کہاں جاناں

چار سو ہیں اداسیاں جاناں

ورنہ اک روز مل ہی جاتے ہم

عمر آئی ہے درمیاں جاناں

تم کو دھوکہ ہوا تھا بارش کا

رو دیا ہو گا آسماں جاناں

ہجر ہر موڑ پر کھڑا ہوگا

بھاگ کر جاؤ گے کہاں جاناں

شام ہوتے ہی چھیڑ دیتا ہے

دل مرا دکھ کی داستاں جاناں

دل نے پھر چھیڑ دی غزل کوئی

پھر طبیعت ہوئی رواں جاناں

ایک دنیا ہوئی ہے فرحت سے

تم بھی ہو جاؤ بد گماں جاناں

فرحت عباس شاہ

مکمل تحریر >>>

sanson ki hararat se pighal janay ka mosam

سانسوں کی حرارت سے پگھل جانے کا موسم

آیا ہے تری آنچ میں جل جانے کا موسم

ہم کو نہیں معلوم تھا ہے عشق کا آغاز

یادوں میں کہیں دور نکل جانے کا موسم

لگتا ہے کہ چہرے پہ ترے ٹھہر گیا ہے

یک لخت کئی رنگ بدل جانے کا موسم

اے شہر تسلی ترے مشکور ہیں لیکن

آیا ہی نہیں دل کے سنبھل جانے کا موسم

یہ شہر تمنا بھی انوکھا ہے کہ اس پر

برسات میں بھی رہتا ہے تھل جانے کا موسم

چہرے پہ اگرچہ ہے مرے صبح کا اجالا

آنکھوں میں مگر شام کے ڈھل جانے کا موسم

فرحت عباس شاہ

مکمل تحریر >>>

ruttan badlan tu thora jeha pehle

رُتاں بدلن توں تھوڑا جیہا پہلے

***********

ساڈے شہروں ٹر گئے چنگے دن

ساڈی عمراں لے گئے نال

اسیں جھلّی فکر جوانی دی

ساڈئ چٹّے ہو گئے وال

سانوں بھُل گیا رووَن دکھّاں تے

ساڈی اکھیں پے گیا کال

ساڈی اکھیں چانن ترس گِیاں

ساڈے لِسّے پے گئے خاب

ساتھوں رُس گئے موسم خوشیاں دے

سانوں لڑ گئے پھُل غُلاب

سانوں ساون چھوڑ کے ٹُر، نَس گئے

ساتھوں دُھپٗاں لَوِن حساب

۔۔۔

اسیں رُنّے ترینہہ وِچ اکھیں دے

سانوں ہَس ہَس ویکھن تھل

اسیں گوڈیاں بھار سفر کیتے

ساڈی رستیاں لاہ لئی کھَل

ساڈی فصلاں پانیاں مار دِتی

ساڈی وستی چل گئے ھَل

۔۔۔

اسیں کلّے رہ گئے جھوٹھیاں وچ

ساڈا لکھ کے لے گئے ناں

ساڈے پیریں جُتّی سفراں دی

ساڈے سِر تے دُھپ دی چھاں

چا ہتھّاں نال بنیریاں نوں

اسیں لبھدے پھرئے کاں

۔۔۔

اسیں ڈھاڈھے اوکھے ساہ لَو یے

ساڈے سینے دے وچ کِل

اِتھے دلّاں دے اندر زخم ہووَن

ساڈے زخماں اندر دل

کدیں آپے پٹیاں بَنھ بَویے

کدیں آپے بَویے چھِل

۔۔۔

ساڈے شہروں ٹر گئے چنگے دن 

ساڈی عمراں لے گئے نال

فرحت عباس شاہ

(دل دے  ہتھ مہار)

مکمل تحریر >>>

main us dholay di mang

اکھّ اِچ جس دے تارے بھکھدے

ہتھ چانن دی ونگ

میں اُس ڈھولے دی منگ

رَتّے لال انار لُکا کے

لے گئے جس دا رنگ

میں اُس ڈھولے دی منگ

جِس دی خاطر کیتی دل نے

سبھّ دنیا نل جنگ

میں اُس ڈھولے دی منگ

جس دی خاطر عمراں ساری

کٹّی بھکھ تے ننگ

میں اُس ڈھولے دی منگ

جس دے بعد وچھوڑے والیاں

شاماں مارن ڈنگ

میں اُس ڈھولے دی منگ

فرحت عباس شاہ

مکمل تحریر >>>