jagna raat bhar udasi main

جاگنا رات بھر اداسی میں

اور کرنا سفر اداسی میں

شام ہوتے ہی جانے کیوں میرا

ڈوب جاتا ہے گھر اداسی میں

چھوڑو ایسی بھی کوئی بات نہیں

کوئی جاتا ہے مر اداسی میں

روزکے روز پینے والوں پر

مختلف تھا اثر اداسی میں

جانے کیا بات دل میں ہوتی ہے

کھلا رہتا ہے در اداسی میں

پھر تمہیں فون کی اجازت ہے

یاد آؤں اگر اداسی میں

اس نے بھی جان بوجھ کر اپنی

مجھ کو دی ہے خبر اداسی میں

میں تو رہتا ہوں بے نیاز بہت

اس کو لگتا ہے ڈر اداسی میں

لگنے لگتے ہیں مجھ کو تم جیسے

سارے شمس و قمر اداسی میں

فرحت عباس شاہ